628 total views
Nagpapasalamat ang Diyosesis ng Kalookan sa ipinaabot na suporta ng Dicastery for Communication of the Holy See sa inilunsad ng diyosesis na Pastoral Communication Research Institute.
Ayon kay Kalookan Bishop Pablo Virgilio David na siya ring pangulo ng Catholic Bishops’ Conference of the Philippines (CBCP), higit na napag-alab ng suporta ng Dicastery for Communication of the Holy See ang misyon at adbokasiya ng diyosesis na mapalaganap ang katotohanan sa pamamagitan ng Pastoral Communication Research Institute na maging kaagapay ng Simbahan sa pakikinig sa mga saloobin ng mamamayan.
Ipinaliwanag ng Obispo na mahalaga ang patuloy na paggabay at suporta ng Holy See sa mga simpleng programa ng maliliit na diyosesis sa iba’t ibang bansa na naglalayong mapalakas pa ang misyon ng Simbahan bilang tagapagpalaganap ng Mabuting Balita ng Panginoon.
“Alam niyo nagulat ako I did not even know na nag-communicate pala yung Dicastery for Social Communication at straight from the Vatican very encouraging. Napaka-encouraging talaga nila they really try to keep tract sa mga social communications developments sa mga dioceses all over the world kaya tuwang-tuwa ako when I saw the letter of support.” pahayag ni Bishop David sa panayam sa Radio Veritas.
Ayon sa Obispo, dahil sa suporta at pagkilala ng Dicastery for Communication of the Holy See sa inisyatibo ng diyosesis ay nabigyan ng mas malawak na kahalagahan ang misyon ng Pastoral Communication Research Institute na maging tagapagkinig ng Simbahan sa kasalukuyang lipunan.
“Binigyan niya ng global significance itong aming munting diocese, parang it’s very humbling like small diocese like Kalookan would even be notice by the Dicastery ng Roma on Social Communications, but the world is really getting smaller and I think talagang napaka-closely in-touch nila sa mga developments sa mga local church all over the world.” Dagdag pa ni Bishop David.
Ayon sa opisyal ng Dicastery for Communication of the Holy See, mahalaga ang iba’t ibang mga inisyatibo at pagsusumikap ng bawat diyosesis upang higit na mapag-alab ang misyon ng Simbahan alinsunod na rin sa panawagan ng Santo Papa Francisco na maging bukas ang Simbahan sa pakikinig at pakikipagdayalo tungo sa pagkakaroon ng ganap na pakikipag-ugnayan sa bawat isa sa lipunan.
Unang inihayag ni Bishop David na ang konsepto ng Pastoral Communication Research Institute ng diyosesis ay bilang tugon sa panawagang synodality ng Santo Papa Francisco at kultura ng pakikipagdayalogo na naglalayong magabayan ang Simbahan upang higit na maging epektibong tagapagpalaganap ng ebanghelyo upang mawaksi ang kasinungalingan at partikular na ang disinformation sa lipunan.
