Inaanyayahan ng Conference of Major Superiors in the Philippines (CMSP) ang mga Pilipino na makibahagi sa patuloy na paninindigan sa diwa ng EDSA People Power Revolution.
Ito ang paanyaya ng CMSP sa paggunita ng ika-39 na anibersaryo ng EDSA People Power Revolution sa ika-25 ng Pebrero, 2025 upang muling paalabin ang diwa ng bloodless revolution.
Ayon sa samahan ng mga relihiyoso sa bansa, mahalaga ang paninindigan ng taumbayan lalo na sa gitna ng patuloy na katiwalian sa lipunan at mga tangkang baguhin ang kasaysayan ng bansa.
Sinabi ng CMSP na ang People Power ay hindi lamang isang bahagi ng kasaysayan ng bansa sa halip isang panghabambuhay na hamon at pangako ng paninindigan para sa katotohanan, katarungan at kabutihan ng buong bayan.
“Upholding the Spirit of People Power! In the face of historical distortion and ongoing corruption, we cannot stay silent. People Power is more than a moment in history—it is a lifelong commitment to truth, justice, and accountability.” Bahagi ng paanyaya ng CMSP.
Bahagi ng paanyaya ng CMSP ang pag-alala sa mga sakripisyo at determinasyon ng mga nakibahagi sa naganap na 1986 EDSA People Power Revolution 39 na taon na ang nakakalipas.
Iginiit ng CMSP na nagpapatuloy pa rin ang paglaban at paninindgan upang matiyak ang patuloy na pag-iral ng demokrasya ng bansa.
“We call on all freedom-loving Filipinos to stand with us. Let us safeguard the legacy of EDSA and ensure that the sacrifices of the past are never forgotten. The struggle for democracy didn’t end in 1986—it continues today. Join us on February 25, 2025. Together, let us show the world that we remain vigilant, that we remember, and that we choose to uphold truth and justice.” Ayon sa CMSP.
Katuwang ng Conference of Major Superiors in the Philippines (CMSP) ang Clergy for Good Governance sa pagsasagawa ng nakatakdang ‘Lakbay Dasal, Diwa ng EDSA Ipagdiwang’ na nakatakda sa ika-25 ng Pebrero, 2025.
Magsisimula ang gawain ganap na alas-dos ng hapon sa pamamagitan ng pagmamartya mula sa Shrine of Mary, Queen Of Peace o mas kilala bilang EDSA Shrine hanggang sa People Power
Monument kung saan nakatakdang magkaroon ng programa ganap na alas-tres ng hapon bago muling magmartya pabalik ng EDSA Shrine para sa misang pangungunahan ni Apostolic Vicariate of Taytay, Palawan Bishop Broderick Pabillo.
