522 total reads
Ipinaalala ng isang Obispo sa mga botante na huwag iboto ang mga kandidatong may programa na magbabalik sa parusang kamatayan sa bansa.
Ayon kay Malaybalay Bishop Jose Cabantan, mula sa aral at nakasaaad sa Evangelii Vitae o Gospel of Life ni St. John Paul II na kailangan nating pangalagaan ang buhay mula sa sinapupunan hanggang sa natural nitong kamatayan.
“Since St. John Paul’s Evangelii Vitae or the Gospel of Life we uphold a consistent ethics of life from conception to natural death, womb to tomb. It was well explained there why death penalty should be abolished in focus on restorative justice, improve life conditions deterring crimes, improve law enforcement in improve justice system,” Mensahe ni Bishop Cabantan.
Iginiit ng obispo sa lahat ng mananampalataya na tutulan ang parusang kamatayan at isulong ang restorative justice sa mga nagkasala.
Pinayuhan ni Bishop Cabantan ang mga kandidato na isulong ang mga programa na magpapaunlad sa buhay sa halip na death penalty.
Hinimok ng obispo ang mga kandidato na ayusin at bigyang pangil ang pagpapatupad ng batas para masawata ang iba’t-ibang krimenalidad at patatagin ang takbo ng katarungan sa bansa.
Nanindigan si Bishop Cabantan na kaakibat ng pagiging Katoliko ang ipagtanggol ang buhay at igalang ito.
Nabatid mula sa datos ng Amnesty International, tumaas ng 1,998 mula sa 61 mga bansa ang bilang ng naparusahan ng kamatayan o 54-porsiyentong pagtaas kung saan pumalo na sa 20,292 katao ang nahatulan ng bitay.
