28,144 total views
Isang araw matapos ang halalan, naniniwala si Novaliches Bishop Roberto Gaa na hindi pa lubos na natutututo ang mga botante sa pagpili ng mga karapat-dapat na pinuno ng pamahalaan.
Ayon kay Bishop Gaa, bagama’t may kaunti nang pagbabago ay marami pa rin ang ibinabase ang kanilang pagpili ng ihahal sa popularidad, kamag-anak at mga kakilala.
“Parang in-process po siya. Pero sa ngayon po sa tingin ko po ay hindi pa rin ganu’n ka-mature ang ating mga bumuboto dahil nga po ay nadadala pa rin sila sa popularity. Hindi tayo tumitingin masyado sa track-record. Kasi para sa akin track-record ang pinaka-importante nating tignan sana ng mga bumuboto. Kasi sinasabi nyan kung paano na siya naglingkod,” ayon kay Bishop Gaa sa programang Pastoral Visit on-the-air ng Radyo Veritas.
Iginiit ng obispo sa pamamagitan ng track record ay makikita kung paano ang kanyang buhay-paglilingkod bilang bahagi ng pamayanan.
Sa katatapos na halalan, muli namang ipinapaalala ni Bishop Gaa sa mga mananampalataya na hindi nagtatapos ang tungkulin ng mga botante sa pakikibahagi sa eleksyon.
Hinimok ng obispo ang bawat isa na patuloy na maging mapagmatyag at bantayan ang bagong halal na opisyal sa kanilang mga gawain at ang ipinangakong tungkulin sa nasasakupan.
“Iyong monitoring at pagsubaybay sa ating mga kandidato, tinutupad ba nila yung kanilang ipinangako? Maayos ba ang kanilang gawa? Yung kanilang proyekto, tama ba ang pagkagastos ng pera?” ayon pa kay Bishop Gaa.
Ito ay mahalagang bahagi ng mamamayan sa pakikilahok sa good governance, na mabantayan at mapanagot ang mga opisyal ng pamahalaan.
