13,870 total reads
Ito ang bahagi ng panawagan ni Tagbilaran Bishop Alberto Uy sa bawat mamamayan na maging matalino at responsableng botante sa nalalapit na 2025 Midterm Elections.
Ayon sa Obispo, mahalaga ang paninindigan ng bawat isa upang mapangalagaan ang kanilang karapatan at dignidad bilang isang responsableng botante para sa kapakanan ng buong bayan.
Pinaalalahanan ni Bishop Uy ang mga botante na huwag ibenta ang kanilang boto sa sinumang kandidato sa halip ay manindigan para sa pagkakaroon ng magandang kinabukasan ng buong bansa.
Iginiit ng Obispo na nakaugat sa pagbabago ng sarili ang pagbabagong hinahangad sa lipunan kaya naman mahalaga ang pagiging matalino, at mapanuri ng bawat botante sa pagpili ng mga kandidatong ihahalal sa iba’t ibang posisyon sa pamahalaan.
“Change doesn’t begin with others; it starts with us-each and every one of us. As we approach the elections, let’s make informed and responsible choices. Protect your rights and dignity; don’t sell them to politicians. Together, we can pave the way for a brighter future for the Philippines.” Bahagi ng pahayag ni Bishop Uy.
Batay sa tala ng Commission on Elections (COMELEC), aabot sa mahigit 69.6 na milyon ang bilang ng mga rehistradong botante para sa nalalapit na 2025 National and Local Elections kung saan kinakailangang maghalal ng mahigit sa 18,200 mga bagong opisyal ng bayan na kinabibilangan ng 12-senador, mga partylist representatives, congressional district representatives, governor, mayor, sangguniang bayan member at iba pa.
