9,009 total reads
Humiling ng panalangin si Tagbilaran Bishop Alberto Uy habang nalalapit ang 130th Annual Retreat and Plenary Assembly ng Catholic Bishops’ Conference of the Philippines.
Itinakda ng CBCP ang pagtitipon ng mga pastol ng simbahan sa June 30 hanggang July 7 kung saan sa kauna-unahang pagkakataon ay isasagawa sa lalawigan ng Bohol.
Ayon kay Bishop Uy isang karangalan at biyaya para sa Boholanos ang pagtanggap sa mga lider ng simbahan sa bansa kaya’t mahalagang ipanalangin ang ikatatagumpay ng pagpupulong.
“This is truly a moment of grace and a source of great honor for our province. Let us pray that this gathering of shepherds may bring about renewed unity, wisdom, and spiritual strength — not only for the Church in the Philippines, but also for the communities they serve,” mensahe ni Bishop Uy.
Isasagawa sa Tagbilaran City ang taunang retreat ng mga obispo habang sa Anda Bohol naman na kabilang sa Diocese of Talibon ang plenary assembly mula July 5 hanggang 7.
Bubuksan sa pagdiriwang ng Banal na Misa ang pagtitipon ng mga obispo sa June 30 na isasagawa sa Shrine of the Our Lady of Assumption sa Dauis Bohol.
Puspusan ang paghahanda ng dalawang diyosesis sa Bohol para sa makasaysayang pagtitipon ng mga lider ng simbahan sa bansa na isasagawa sa lalawigan.
Nakipagtulungan din ang mga diyosesis sa lokal na pamahalaan para sa maayos at seguridad ng pagtitipon.
