25,181 total views
Tiniyak ng bagong pastol ng Diocese of Ipil ang pakikilakbay sa kawang ipagkakatiwala sa kanyang pangangalaga alinsunod sa panawagang simbahang sinodal.
Ikinatuwa ni Bishop Glenn Corsiga ang mainit na pagtanggap ng pamayanan ng Ipil na daan upang gumaan ang kanyang kalooban sa pagharap sa mas malawak na misyon ng kanyang piniling bokasyon.
Aniya makatutulong ito upang higit na maisabuhay ang ninanais na simbahang sinodal o simbahang nagbubuklod sa paglalakbay.
“We will be journeying together in communion, in participation, and in mission because that is what the Church calls us to do at the moment in synodality with each other,” pahayag ni Bishop Corsiga sa Radyo Veritas.
Batid ng obispo ang kahandaang makinig at makilakbay sa pamayanan kasama ang mga paring magiging katuwang sa pagpapastol sa mahigit kalahating milyong katoliko sa lugar.
“I will spend a period of listening. I will journey with them, so that I can understand the plans they have already made,” dagdag ng obispo.
Bukod dito hiniling din ni Bishop Corsiga sa mga pari ng diyosesis na turuan at gabayan ito sa kanyang mga gawaing pagpapastol lalo na sa pakikipag-ugnayan sa lokal na pamahalaan at sa Muslim community na tinatayang nasa 15 porsyento sa kabuuang populasyon ng Zamboanga Sibugay.
“Teach me how to journey—especially with our Muslim brothers and sisters—and in partnership with the local government,” ani Bishop Corsiga.
Naniniwala ang obispo na sa pagkakaisa at pagtutulungan ng pamayanan ay makamit ang higit na pag-unlad bilang kawan ng Panginoon at komunidad na pinagbubuklod ng pag-ibig.
“Our partnership will grow into something that will bear fruit not only for Ipil but for the entire Sibugay as a province,” giit ng obispo.
Ito rin ay tugma sa episcopal motto ng obispo na ‘Amare Et Servire’ na patuloy paglilingkod sa diwa ng pag-ibig ng Panginoon sa sangkatauhan.
Matatandaandang April 14 nang italaga si Bishop Corsiga bilang kahaliling pastol ni Bishop Julius Tonel na ngayo’y arsobispo ng Archdiocese of Zamboanga.
Ang obispo ang pinakahuling itinalaga ni Pope Francis bago pumanaw noong April 21, 2025.
Nitong July 29 nang ginawaran ng episcopal ordination si Bishop Corsiga sa St. Catherine of Alexandria Cathedral sa Dumaguete City sa ritong pinangunahan ni Archbishop Tonel katuwang sina Dumaguete Bishop Julito Cortes at Palo Archbishop John Du habang si Cebu Archbishop Emeritus Jose Palma naman ang nagsilbing homilist sa pagdiriwang.
Dumalo sa pagdiriwang ang mga obispong kasapi ng Catholic Bishops’ Conference of the Philippines kabilang na si Manila Archbishop Jose Cardinal Advincula.
Itinakda naman ng Diocese of Ipil ang pagluluklok kay Bishop Corsiga sa cathedra ng St. Joseph the Worker Cathedral sa August 14.
