12,420 total reads
Nanawagan si Deputy Speaker at National Unity Party (NUP) chairman Ronaldo Puno sa pagsasagawa ng isang constitutional convention (ConCon) para muling pag-aralan at ayusin ang 1987 constitution upang alisin ang matagal nang malalabong probisyon at mga pagkukulang na nagpapahina sa batas at sa tiwala ng taumbayan.
Sa kanyang privilege speech sa Kamara, binigyang-diin ni Puno na ang ConCon ang pinakamabuti, malinaw, at may pinakamaraming nakikilahok na paraan upang maitama ang probisyon at maipatupad ang kinakailangang reporma.
“Today, I submit to this august chamber that while the provisions of our Constitution are noble in aspiration, certain provisions are marked by ambiguity and procedural deficiency. These deficiencies do not merely complicate interpretation; they obstruct reform, hinder effective governance, and erode public trust,” ayon kay Puno.
Paglilinaw ng mambabatas, ang panukala ay hindi upang ipagwalang-bahala ang Konstitusyon, sa halip ay upang buuin at ayusin ito.
Ayon kay Puno, ang ConCon ay magbibigay sa mamamayan ng pagkakataon na “itama ang mga pagkukulang sa teksto, pag-isahin ang mga magkasalungat, alisin ang mga hindi malinaw, gawing permanente ang mga kinakailangang reporma, at tiyakin na ang batayang batas ng bansa ay akma sa pangangailangan ng isang masigla at demokratikong lipunan.“
Sinabi ng mambabatas na sa ConCon ay may malinaw at iisang layunin, at hindi mahahati ang atensyon ng mga delegado sa paggawa ng batas, oversight, o impeachment.
Dagdag pa niya, maiiwasan ang conflict of interest, masisiguro ang mas malawak na representasyon, at mababawasan ang panganib ng mga desisyong pabor lamang sa pulitika.
Bilang halimbawa ng mga hindi malinaw o tumpak na probisyon, na tinukoy ni Puno ang salitang “forthwith” sa impeachment rules na naging sanhi ng “deadlock and controversy”; Walang malinaw na sistema kung paano pipiliin ang “representative of Congress” sa Judicial and Bar Council sa ilalim ng bicameral legislature; Kakulangan ng linaw kung joint o separate vote ang kailangan sa batas ukol sa tax exemptions; Kawalan ng tiyak na proseso sa pagbibigay ng presidential amnesty kung joint o separate voting at paulit-ulit na pagpapaliban ng barangay elections.
“A Constitution that allows repeated legislative interference in electoral timelines, without limit, is a Constitution vulnerable to manipulation,” ayon kay Puno.
Binigyang-diin niya na bilang pangunahing batas ng bansa, dapat malinaw, matatag, at madaling maunawaan ang Konstitusyon ng hukuman, mambabatas, at lahat ng mamamayan na pinangangalagaan ang karapatan.
