Mariing kinondena ng Church Leaders Council for National Transformation ang malawakang katiwalian sa mga flood control project ng bansa na tinawag nilang ‘pangwawasak ng kabuhayan ng bansa at lubos na kasamaan.’
Pinangunahan nina Bishop Colin Bagaforo ng Caritas Philippines, Bishop Robie Gaa ng Novaliches, at Bishop Efraim Tendero ng Evangelical Churches of the Philippines, inilabas ng konseho ang kanilang pahayag matapos ibunyag ni Senador Panfilo Lacson na bilyong pisong pondo para sa mga flood control projects ang nauwi sa mga ghost project, mababang kalidad na imprastraktura, at palakasan system.
Ayon sa ulat, tinatayang apatnapung porsiyento lamang ng pondo ang tunay na nagamit para sa nararapat nitong layunin.
Ayon kay Bishop Bagaforo, ang iskandalong ito ang dahilan kung bakit patuloy na lumulubog sa baha ang mga siyudad, mas matindi ang pinsala tuwing may bagyo, at may mga inosenteng buhay na nasasawi.
“This scandal has left our cities submerged, amplified the devastation of typhoons, and claimed innocent lives. It is a betrayal of the people’s dignity,” ayon kay Bishop Bagaforo.
Iginiit naman ni Bishop Gaa, bawat pisong nananakaw ay buhay na nalalagay sa panganib at bawat tiwaling kasunduan ay baha na sumisira sa kinabukasan ng bansa.
“Every peso stolen is a life put at risk. Every corrupt deal is a flood that submerges our nation’s future,” ayon naman kay Bishop Gaa.
Binigyang-diin ng konseho ang turo ng Simbahan na ang korapsyon ay tuwirang nagdudulot ng pagkasira ng kalikasan at mas mabigat na pasanin sa mahihirap.
Kasabay ng Season of Creation, nanawagan ang mga obispo sa publiko na manindigan para sa transparency, igiit ang reporma upang matiyak na tama ang paggamit ng pondo, at itaguyod ang pangangalaga sa kalikasan bilang anyo ng katarungan para sa mga mahihirap.
Sa kanilang paninindigan, tiniyak ng mga obispo na hindi sila mananahimik, kundi’y makikibaka kasama ng mga naaapi, ilalantad ang katiwalian, at magsusulong ng tunay na pagbabago para sa bansa.
“We will stand with the poor, we will expose corruption, and we will work for national transformation.”
