44,646 total views
Nanawagan si Borongan Bishop Crispin Varquez sa mga mananampalataya at pamayanan na muling ayusin ang prayoridad ng lipunan sa pangangalaga ng kalikasan, kasabay ng pagdiriwang ng Season of Creation 2025.
Sa kanyang pastoral statement, binigyang-diin ng obispo na dapat ilagay sa wastong pagkakasunod-sunod ang pinahahalagahan ng tao–una, ang pangangalaga sa daigdig, ikalawa, ang lipunan, at pangatlo lamang ang ekonomiya.
Binatikos ni Bishop Varquez ang labis na pagpapahalaga sa ekonomiya na nagiging sanhi ng pagsasantabi sa karapatan ng kalikasan at mga apektadong pamayanan, bagay na humahantong sa matindin pinsala sa kapaligiran at lipunan.
“Let us wake up to the truth that the wrong prioritizing of the economy has led to the degradation, even destruction of much of the earth’s resources. It has also divided peoples and nations into rich and poor. It has consequently deeply wounded the harmony between creation and humankind and between nations themselves,” pahayag ni Bishop Varquez.
Bilang halimbawa, ibinahagi ng obispo ang karanasan ni retired astronaut Ronald John Garan, na namangha sa kagandahan ng daigdig mula sa kalawakan dahil sa kawalan ng hangganan at pagkakahati-hati.
Ngunit, nang bumalik ito sa lupa, agad nasaksihan ni Garan ang muling pagkakahati ng mundo dahil sa pulitika, kapangyarihan, at maling pagpapahalaga na inuuna ang ekonomiya higit sa lahat.
“Nations are in conflict basically because the order or hierarchy of priorities at work is wrong. Mankind at present ranks the economy as first in the order of priorities. This is wrong because it puts our planet in danger due to the insatiable human greed that also victimizes the poor,” ayon kay Bishop Varquez.
Kaugnay nito, ipinaalala rin ni Bishop Varquez ang mga aral ni Pope Francis sa kanyang ensiklikal na Laudato Si’, na nagpapaalala na ang mundo ay nag-iisang tahanang dapat pangalagaan laban sa banta ng konsumerismo at mapaminsalang pag-unlad.
Hinikayat ng obispo ang lahat na gisingin ang kamalayan, ituwid ang maling pananaw, at manalangin upang maisabuhay ang kalooban ng Diyos sa tamang paggamit at pangangalaga ng mga likas na yaman.
“The Creator of the universe handed to humans the earth to cultivate and preserve (Gen 2:15), not to abuse or destroy. From time to time he commands that the land itself be given rest and not abused (Lev 25:1-7),” saad ni Bishop Varquez.
