11,419 total views
Pinuna ni Deputy Speaker Janette Garin ng Iloilo ang tuloy-tuloy na paglaki ng kita ng mga kumpanya ng mag-asawang Pacifico at Sarah Discaya, maging sa panahon ng Covid-19 pandemic.
Ang mag-asawang Discaya ay ang may ari ng St. Timothy Construction Corp. at siyam na iba pang construction firm na bahagi ng iniimbestigahan ng Kamara at Senado dahil sa ghost at substandard infrastructure at flood control projects ng pamahalan.
Ayon kay Garin, ang paglago ng kita ng mag-asawa ay sa kabila ng pandaigdigang pagbagsak ng ekonomiya, kabilang na ang Pilipinas na dulot ng epekto ng pandemya.
Batay sa financial statements na isinumite sa Securities and Exchange Commission (SEC), umabot sa ₱11.58 bilyon ang kita ng Discaya group mula sa gobyerno noong 2020. Sumunod ang ₱16.07 bilyon noong 2021, at ₱20.52 bilyon noong 2022. Noong 2023, nanatili sa mataas na antas ang kita na ₱18.62 bilyon.
Ayon kay Garin, kasabay ng pagtaas ng kita ng mga kumpanya ang malawakang kahirapan sa bansa at hindi sapat na suweldo ng mga healthcare workers, na naglalarawan ng matinding kaibahan sa pagitan ng lumalaking yaman ng ilang pribadong kumpanya at ng hirap ng ordinaryong Pilipino dulot ng pandemya.
“Ito ang panahon na marami ang nawalan ng trabaho, marami ang uncertainties, marami ang namatay, marami ang lumubog sa utang dahil napakamahal ng testing sa Pilipinas,” wika ni Garin.
Dagdag niya: “Ito rin ang panahon na ang ating healthcare workers ay hindi naswelduhan ng tama. Pero ang Discaya group of companies, ang revenue nila from government ay P11.583 billion [in 2020].”
“Of course, with due courtesy to Mr. Discaya, siguro they took advantage of a situation,” ayon kay Garin.
Taong 2020-sa ilalim ng administrasyon ni dating Pangulong Rodrigo Duterte nang maranasan ng bansa ang matinding hamon sa kalusugan, at ekonomiya, kung saan ang nagpatupad ng lockdown at quarantine measures sa buong bansa upang mapigilan ang pagkalat ng COVID-19 na naging dahilan kung bakit maraming negosyo at trabaho ang naapektuhan, kabilang na ang pagtaas ang bilang ng mga mahihirap at nawalan ng hanapbuhay.
Ayon sa datos mula sa Philippine Statistics Authority (PSA), tinatayang 7.3 milyong manggagawa ang nawalan ng trabaho sa Pilipinas noong Abril 2020 dahil sa epekto ng COVID-19 pandemic. Ang bilang na ito ay nagresulta sa pinakamataas na antas ng 17.7% unemployment rate sa kasaysayan ng bansa
