432,103 total reads
Ipinahayag ni Malolos Bishop Dennis Villarojo na ang tunay na diwa ng paglilingkod sa Simbahan ay hindi paghahangad ng pagkilala kundi pasasalamat sa biyayang makapaglingkod.
Sa kanyang homiliya sa Chrism Mass na ginanap sa Katedral at Basilika Menor ng Inmaculada Concepcion nitong Martes Santo, iginiit ng obispo sa mga pari na dapat “Tayo ang nagpapasalamat dahil tayo ang pinaglingkod.”
Paliwanag ng obispo, ang paglilingkod ng pari ay hindi nagmumula sa sariling kabutihan kundi sa biyaya ng Diyos na pumipili at nagtatalaga ng mga pastol.
“Service does not spring from our gratitude. We are grateful because we have been given the chance. We have been chosen to serve,” ayon kay Bishop Villarojo.
Babala ni Bishop Villarojo sa mga pari ang panganib ng pagiging entitled sa kanilang ministeryo at pagpapastol sa kawang ipinagkakatiwala sa kanilang pangangalaga.
“What is supposed to be a privilege can become a sense of entitlement. Entitlement begets expectations; failed expectations beget disappointment,” dagdag pa ni Bishop Villarojo.
Ayon sa obispo, kapag ang pari ay naghahangad ng pasasalamat, nasisira ang ugnayan ng diakonia at eukaristiya at nawawala ang galak sa paglilingkod na lalong nagpapabigat sa pagganap ng tungkulin ng isang pastol.
Iginiit din ni Bishop Villarojo na ang pagkapari ay hindi karaniwang serbisyo kundi pakikibahagi sa mismong gawain ni Kristo.
Kasabay ang paalala na ang pari ay tinatawag upang maging buhay na instrumento ni Hesus sa mundo.
“Hindi ito karaniwang paglilingkod. Ito’y pakikibahagi sa paglilingkod ni Kristo… The priesthood is the perpetuation of Christ’s work, His incarnation,” saad ng obispo.
Sa konkretong paglalarawan, hinimok ng obispo ang mga pari na gamitin ang kanilang mga kakayahan bilang daluyan ng habag at pag-ibig ng Panginoon.
“Itong mga kamay na ito ay inilalaan sa pagbabasbas… sa pag-aangat ng mga taong nalulugmok,” aniya.
Muling binigyang-diin ni Bishop Villarojo na ang sukatan ng paglilingkod ay hindi papuri kundi ang pagiging daluyan ng pag-ibig ng Diyos.
“Hindi hangad ng pari na siya ay pasalamatan. Sapat na siya ay ginamit ni Cristo upang maipadama ang pag-ibig ng Diyos sa bawat tao,” giit ni Bishop Villarojo.
