7,781 total views
Iginiit ni Lingayen-Dagupan Archbishop Socrates Villegas na ang debosyon sa Mahal na Birhen ng Manaoag ay mahalagang tugon sa lumalalang kultura ng kasinungalingan at manipulasyon sa lipunan.
Ito ang pahayag ng arsobispo sa ginanap na press conference sa Minor Basilica of Our Lady of the Rosary of Manaoag, nitong April 7 kaugnay sa paghahanda sa 100th canonical coronation anniversary ng Birhen ng Manaoag.
Babala ni Archbishop Villegas ang paglaganap ng fake news at magkakasalungat na paniniwala na humihingi ng tiwala ng publiko.
“There is only one voice that is necessary, and that is the voice of God, that is the voice of truth,” ayon kay Archbishop Villegas.
Binigyang-diin ni Archbishop Villegas na ang Manaoag ay nagsisilbing tinig na nag-aanyaya na pakinggan ang tinig ng katotohanan na nagmumula sa Diyos.
“Manaoag and the devotion to Our Lady of Manaoag are among our antidotes to the culture of fake news, to the culture of manipulating public beliefs and public perception,” ani ng arsobispo.
Iginiit ng arsobispo na sa gitna ng digmaan at karahasan sa mundo, ang mensahe ng isang ina, ang lambing, habag at awa, ang tunay na lunas.
“We should not be afraid to be merciful… because mercy, compassion, and tenderness are qualities of strong people,” ani Archbishop Villegas.
Hinimok din nito ang mga mananampalataya na palalimin ang buhay-pananalangin at iginiit na ang kapayapaan ay makakamtan lamang sa pamamagitan ng Diyos.
“If there is to be peace, it will come from God through the hands of Our Lady,” dagdag pa ng arsobispo.
Sa paggunita sa ika-100 anibersaryo ng canonical coronation ng Birhen ng Manaoag sa April 22, 2026, binigyang-diin ni Archbishop Villegas na ang panawagan ng Manaoag ay para sa katotohanan, habag at kapayapaan—hindi lamang para sa Pilipinas kundi para sa buong mundo.
Ilan sa mga nakatakdang gawain para sa pagdiriwang ang muling pagtatalaga ng dambana sa April 21 sa alas 4 ng hapon na pangungunahan ni Archbishop Villegas, habang sa April 22 ng alas 9 ng umaga isasagawa ang reenactment ng pagpuputong ng korona sa Birhen na pangungunahan ni Papal Nuncio to the Philippines Archbishop Charles Brown, at sa alas 4 ng hapon naman ang pontifical mass na susundan ng prosesyon.
