8,507 total reads
Kinilala ni Antipolo Bishop Ruperto Santos ang matibay na ugnayan ng Simbahan at estado sa pagdiriwang ng ika-75 anibersaryo ng diplomatic relations ng Holy See at Pilipinas.
Ayon sa obispo, ang mahigit pitong dekadang ugnayan ay nagpapatunay sa mas malalim na pagtutulungan para sa kapakanan ng mga Pilipino.
“This milestone stands as a beautiful testament to the enduring bond of faith, communion, and collaboration between the Church and our beloved nation,” ayon kay Bishop Santos.
Pinasalamatan din ni Bishop Santos ang patuloy na misyon ng Holy See sa bansa na nakatutulong na mapalapit ang presensya ng Santo Papa sa halos 80 milyong Pilipinong Katoliko.
“We give thanks for the presence and mission of the Holy See in the Philippines, which continues to strengthen our people in faith, guide us in truth, and unite us ever more closely to the universal Church under the Holy Father,” ani Bishop Santos.
Iginiit ng obispo na ang pagdiriwang ay paalala ng biyaya at katapatan ng Panginoon sa kanyang sambayanan, kasabay ng pananalangin para sa higit na paglago ng mga gawaing pagmimisyon ng Holy See sa bansa tungo sa isang matatag na ugnayan at malawak na ebanghelisasyon ng simbahan.
Tiniyak din ng pastol ang pakikiisa sa pamamagitan ng panalangin at banal na misa para sa selebrasyon.
Bagama’t noong 1902 may delegasyon ang Holy See sa Pilipinas, pormal na naitatag ang Apostolic Nunciature noong April 8, 1951, sa pangunguna ni noo’y Pope Pius XII at dating Pangulong Elpidio Quirino.
Isa sa mga tampok sa pitong dekadang misyon ang pagdalaw ng mga punong pastol ng simbahan kabilang sina Pope Paul VI noong 1970, St. John Paul II noong 1981 at 1995, at Pope Francis naman noong 2015.
