13,284 total views
Ginunita ng Simbahang Katolika ngayong araw Abril 21 ang unang anibersaryo ng pagpanaw ni Pope Francis.
Pumanaw ang dating Santo Papa noong Easter Monday, Abril 21, 2025, sa edad na 88 sa Casa Santa Marta sa loob ng Vatican City.
Sa loob ng 12 taong pamumuno mula nang mahalal noong March 13, 2013, kinilala si Pope Francis sa kanyang mapagkumbabang paglilingkod at makataong pamumuno sa Simbahang Katolika.
Patuloy ring inaalala ng mga mananampalataya ang kanyang mgga naiwang pamana ng malalim na pagmamalasakit sa kapwaa lalo na sa mahihirap, pagsusulong ng kapayapaan, at pagpapalalim ng pananampalataya sa buong mundo.
Samantala, nagdaos din ng banal na Misa sa Casa Santa Marta bilang paggunita sa unang anibersaryo ng pagpanaw ni Pope Francis.
Pinangunahan ang pagdiriwang ng banal na misa ni Archbishop Luigi Travaglino, kung saan binigyang-diin ng Arsobispo ang patuloy na presensya at alaala ng yumaong Santo Papa sa puso ng Simbahan.
Sa pagninilay ni Cardinal Angelo Acerbi, inalala ng Cardinal ang tapang at dedikasyon ni Pope Francis sa paglilingkod bilang pinuno ng Simbahang Katolika sa kabila ng karamdaman.
Bahagi rin ng paggunita sa dating Santo Papa ang pananalangin at Misa sa Basilica of Saint Mary Major kung saan may malalim na debosyon si Pope Francis at kung saan siya inilibing.
Patuloy namang inaanyayahan ang mga mananampalataya na ipanalangin ang kaluluwa ng dating Santo Papa.
Matatandaang makasaysayan rin ang naging personal na pagbisita ni Pope Francis sa Pilipinas noong January 15 to 19, 2015 na may temang ang “Mercy and Compassion” na layuning personal na makita, makasalamuha, madamayan at mabigyan ng inspirasyon sa muling bumangon ang mga nasalanta ng Super Typhoon Yolanda na tumama sa Eastern Visayas noong Nobyembre ng taong 2013.
