10,720 total reads
Inaprubahan ng Kanyang Kabanalan Pope Leo XIV ang paglikha ng Inter-Dicasterial Commission on Artificial Intelligence upang tugunan ang mga usaping kaugnay ng mabilis na pag-unlad ng artificial intelligence o AI.
Layunin ng bagong komisyon na pag-aralan ang epekto ng AI sa tao at lipunan habang pinangangalagaan ang dignidad at integral na pag-unlad ng bawat indibidwal.
Ayon sa Holy See, pansamantalang pangungunahan ng Dicastery for Promoting Integral Human Development ang koordinasyon ng grupo sa unang taon ng operasyon nito.
Isinapubliko ni Cardinal Michael Czerny, Prefect of the Dicastery for Promoting Integral Human Development ang naturang hakbang at ibinahagi ang pagmamalasakit ng Simbahan para sa dignidad ng bawat tao dahil sa mga potensyal na epekto ng pag-unlad ng artificial intelligence o AI sa mga tao at kabuuan ng sangkatauhan.
Magsisilbing mandato at responsibilidad ng institusyon na mapadali ang kolaborasyon at ugnayan sa pagpapalitan ng impormasyon sa mga miyembro ng grupo tungkol sa mga aktibidad, gawain at proyekto na may kaugnayan sa Artificial Intelligence, kabilang ang mga patakaran sa paggamit nito sa loob ng Holy See, habang itinataguyod ang diyalogo, komunyon, at pakikilahok.
“It is the responsibility of the coordinating institution to facilitate collaboration and the exchange of information among group members regarding activities and projects related to Artificial Intelligence, including policies on its use within the Holy See, while promoting dialogue, communion, and participation.” Dagdag pa ni Cardinal Czerny.
Binubuo ang komisyon ng mga kinatawan mula sa pitong tanggapan ng Vatican kabilang ang Dicastery for Promoting Integral Human Development, Dicastery for the Doctrine of the Faith, Dicastery for Culture and Education, Dicastery for Communication, Pontifical Academy for Life, Pontifical Academy of Sciences, at Pontifical Academy of Social Sciences.
Matatandaang madalas ding binibigyang-diin ni Pope Leo XIV ang pangangailangang gamitin ang makabagong teknolohiya nang may pananagutan at paggalang sa dignidad ng tao lalo na sa harap ng mabilis na pag-unlad ng artificial intelligence sa kasalukuyang modernong panahon.
