17,339 total reads
Nagsagawa ng aerial inspection ang mga miyembro ng Kamara sa Northern Sierra Madre Natural Park sa Isabela bilang bahagi ng mas pinalakas na panawagan para sa pangangalaga ng Sierra Madre mountain range.
Ito ay sa pangunguna ni Speaker Faustino Dy III kasama ang ilang mambabatas at technical stakeholders, kung saan nilibot sa himpapawid ang ilang bahagi ng kagubatan, watershed, at mga komunidad na nasa panganib ng ilegal na pagtotroso at pinsala ng kalikasan.
Kasabay nito ang pagsusulong ng House Bill 3538 na layong lumikha ng Sierra Madre Conservation and Development Authority o SMCDA, na siyang mamamahala sa pangmatagalang proteksyon at pag-unlad ng kabundukan.
“The Sierra Madre is not just a mountain range. It is our natural defense against calamities, our source of biodiversity, and a lifeline for millions of Filipinos,” ayon kay Dy.
Saklaw nito ang mahigit 540 kilometro at bumabagtas sa 10 lalawigan-kabilang ang Cagayan, Isabela, Aurora, Nueva Vizcaya, Quirino, Nueva Ecija, Rizal, Bulacan, Laguna at Quezon, na nangangalaga sa milyun-milyong Pilipino sa Luzon.
Sa paliwanag ng mga mambabatas, ilang malalakas na bagyo tulad ng Lawin, Ompong, at Ulysses ay humina nang dumaan sa Sierra Madre, na nagpapakita ng mahalagang gampanin sa pangangalaga laban sa kalamidad.
Ngunit babala ng Kamara, patuloy ang banta ng ilegal na pagtotroso, kaingin, at pagkasira ng kagubatan na maaaring magpalala ng pagbaha at landslide sa mga susunod na taon.
Sa ilalim ng panukala, ang SMCDA ang mamamahala sa komprehensibong plano para sa pangangalaga ng kagubatan, watershed, biodiversity, at sustainable development sa buong Sierra Madre.
Layunin din nitong pag-ugnayin ang mga ahensya ng gobyerno at lokal na pamahalaan para sa mas mahigpit na pagpapatupad ng mga batas pangkalikasan.
Kasama rin sa mandato ang pagpigil sa mga proyekto na makakasira sa kalikasan, habang isinusulong ang eco-tourism at mga sustainable na kabuhayan.
Ayon kay Speaker Dy, hindi lamang ito usapin ng kalikasan kundi ng seguridad at kaligtasan ng mamamayan, lalo na sa harap ng lumalakas na mga bagyo at climate change.
Bukod kay Dy, kabilang din sa mga kasama sa inspeksyon sina Batangas Rep. King Collantes, Antipolo City Rep. Philip Conrad Acop, Abang Lingkod Party-list Rep. Manuel Ko, at KAMANGGAGAWA Party-List Rep. Elijah R. San Fernando.
Ang Northern Sierra Madre Natural Park sa Isabela ay itinuturing na isa sa pinakamayamang protected area sa Pilipinas pagdating sa biodiversity. Bahagi ito ng nalalabing old-growth forest sa bansa at tahanan ng maraming natatanging uri ng halaman at hayop, kabilang ang mga endemic at endangered species.
.(marian)
