6,204 total views
Mariing kinondena ng Angat Kalikasan Katutubo Pilipinas Inc. (AKKaP) ang pagputol sa 617 puno sa kahabaan ng Quirino Avenue sa Lungsod ng Maynila upang bigyang-daan ang mga proyektong pang-imprastraktura at urban development.
Ayon sa AKKaP, taliwas ito sa patuloy na panawagan para sa matinding pagkilos laban sa krisis sa klima, pagpapanumbalik ng kagubatan, at pagsusulong ng mga solusyong nakabatay sa kalikasan, sa gitna ng patuloy na paglala ng epekto ng pagbabago ng klima.
Una nang inihayag ng Department of Environment and Natural Resources (DENR) na may pahintulot ang pagputol sa mahigit 600 puno para sa Southern Access Link Expressway (SALEx) project ng San Miguel Corporation na magdurugtong sa Skyway patungong Roxas Boulevard.
“Inaabot ng ilang dekada bago lumaki ang isang puno, magbigay-buhay sa biodiversity, sumipsip ng carbon, magpababa ng temperatura, at magsilbing proteksyon ng mga komunidad laban sa lumalalang epekto ng climate crisis, ngunit ilang segundo lamang ang kailangan upang ito ay putulin,” pahayag ng AKKaP.
Iginiit ng grupo na nakababahala ang patuloy na pagdami ng mga konkretong imprastraktura sa mga lungsod habang unti-unting nawawala ang mahahalagang luntiang espasyo at ecosystem dahil sa mga proyektong itinuturing na kaunlaran.
Dagdag pa ng AKKaP, hindi dapat sinusukat ang pag-unlad sa dami ng kalsada, gusali, at kita, habang isinasantabi ang kalikasan at mga likas na yaman.
“Hindi dapat isinasakripisyo ang ating natitirang green spaces sa ngalan ng kaunlaran,” giit ng AKKaP.
Sa halip, hinamon ng grupo ang pamahalaan at pribadong sektor na pagtuunan ng pansin ang makakalikasan at sustenableng pagpaplano ng mga lungsod, pagpapaunlad ng mga pampublikong liwasan, maayos na sistema ng pampublikong transportasyon, at pagpapatatag ng mga komunidad laban sa epekto ng mga sakuna at kalamidad.
Nanawagan din ang AKKaP ng pananagutan, transparency, at tunay na pangangalaga sa kalikasan sa lahat ng mga proyektong pangkaunlaran.
“Walang sustainable na kinabukasan kung patuloy nating pinuputol ang mismong nagbibigay-buhay sa atin,” ayon pa sa AKKaP.
