10,576 total reads
Hinimok ni Radio Veritas President at CEO na si Fr. Roy Bellen ang mga lingkod ng social communications ng Archdiocese of Manila na maging tagapagbuklod ng mamamayan sa pamamagitan ng pagpapahayag ng katotohanan at pag-asa.
Ito ang mensahe ng pari sa pagtatapos ng tatlong araw na Media Camp 2026 na ginanap sa St. Michael Retreat House sa Antipolo City mula May 22 hanggang 24 kasabay ng pagdiriwang ng Dakilang Kapistahan ng Pentekostes.
Ayon kay Fr. Bellen, mahalagang gamitin ng mga nasa larangan ng media at social communications ang kanilang kakayahan upang magbigay-buhay at inspirasyon sa kapwa.
“We are given life, the breath of the Holy Spirit; tayo rin sana ay makapagbigay ng buhay sa iba,” pahayag ni Fr. Bellen sa Radio Veritas.
Binigyang-diin din ng pari ang mahalagang papel ng mga social communicators sa gitna ng umiiral na pagkakahati-hati sa lipunan.
“It’s a time for us, hindi para po magkampihan; it’s a time for us to unite people. And there is no other way to be united but by being behind the truth,” ani Fr. Bellen.
Pinaalalahanan din ng pari ang mga media ministers na ang layunin ng pagpapahayag ng katotohanan ay hindi upang manira o manghiya ng kapwa kundi upang maitaguyod ang pagkakaisa.
“Tayo po ay nagpapahayag ng katotohanan, not para gumanti, para magpahiya sa tao, kundi para lumabas ang katotohanan and hopefully, tayo pong lahat ay magkaisa,” dagdag pa ng pari.
Kinilala rin ni Fr. Bellen ang mahalagang ambag ng mga nasa likod ng kamera at mga nasa larangan ng komunikasyon bilang mga instrumento ng Simbahan sa pagpapalaganap ng katotohanan at pag-asa.
Pinangunahan din ni Fr. Bellen ang commissioning ng mga delegado bilang hamon na higit pang paigtingin ang misyon ng mga media ministers sa pagpapalaganap ng Mabuting Balita, lalo na sa digital continent.
Dinaluhan ang Media Camp ng 55 lingkod ng Social Communication Ministry mula sa iba’t ibang parokya ng Archdiocese of Manila bilang bahagi ng pagpapatibay sa kanilang kakayahan sa media, komunikasyon, at ebanghelisasyon.
Pinagnilayan sa pagtitipon ang tema ng 60th World Day for Social Communications na “Preserving Human Voices and Faces,” kung saan tinalakay ni Fr. Bellen ang mensahe ni Pope Leo XIV.
Tampok din sa tatlong araw na Media Camp ang iba’t ibang workshop para sa pagpapaigting ng kakayahan ng mga media ministers sa gawaing ebanghelisasyon sa digital platforms.
Kabilang sa mga nagbahagi ng workshop sina Art Samaniego sa paksang “Cybersecurity and Scams,” Jonathan Montes para sa “Basic Voice Acting Workshop,” at Amelia Canlas para sa “Basic Acting and Hosting Workshop and Their Role in Christian Communication.
