670 total views
Binigyang-diin ng Climate Change Commission (CCC) na dapat samahan ng mas matatag na pagkilos para sa climate resilience at sustainable development ang pagkilala ng World Bank sa Pilipinas bilang isang upper-middle income country.
Ayon kay CCC Vice Chairperson at Executive Director Robert E.A. Borje, sumasalamin ang bagong katayuan ng bansa sa matatag na ekonomiya at patuloy na pag-unlad, kasabay ng kahalagahan ng pagpapatuloy ng mga repormang magtitiyak ng pangmatagalang pag-unlad na nakikinabang ang lahat.
Binigyang-diin din ni Borje na magkaugnay ang pag-unlad ng ekonomiya at katatagan laban sa epekto ng climate change, kaya’t kinakailangang sabay na palakasin ang dalawang ito.
“Economic progress and climate resilience are mutually reinforcing. Sustaining one increasingly depends on strengthening the other,” pahayag ni Borje.
Ayon sa CCC, nagbubukas din ang bagong economic classification ng mas maraming pagkakataon upang mapalawak ang pamumuhunan sa climate resilience at maisulong ang makatarungang paglipat sa low-carbon economy.
Inaasahan din nitong mapalalakas ang pagsusulong ng sustainable development alinsunod sa Philippine Development Plan at sa mga pandaigdigang pangako ng bansa sa usapin ng klima.
Tiniyak din ng komisyon ang patuloy na pakikipagtulungan sa iba’t ibang sektor upang maisulong ang pagkilos para sa klima at mapalakas ang katatagan ng bansa.
“This Office remains committed to working with government agencies, local government units, the private sector, development partners, the academe and scientific community, civil society organizations, and stakeholders to ensure that climate action strengthens resilience, supports sustainable economic growth, and advances the country’s long-term development,” dagdag ni Borje.
Isinusulong naman ng simbahan, sa pamamagitan ng Laudato Si’, na ang tunay na kaunlaran ay nakabatay sa pangangalaga sa kalikasan, pagsusulong ng katarungang panlipunan, at pananagutan sa susunod na henerasyon.
