757 total views
Nanawagan ang pamunuan, mga mag-aaral at kawani ng Adamson University na tiyaking mapangangalagaan ang mga puno at makasaysayang gusali sa gitna ng planong pagtatayo ng Southern Access Link Expressway (SALEX) sa kahabaan ng San Marcelino Street sa Maynila.
Sa isinagawang kilos-protesta, ipinahayag ng pamantasan ang pagkabahala sa posibleng epekto ng proyekto sa kapaligiran ng unibersidad, mga natitirang luntiang espasyo, at mga gusaling may mahalagang kasaysayan.
Ayon kay Adamson University President Fr. Daniel Franklin Pilario, CM, kaakibat ng mga programa ng unibersidad sa sustainability ang patuloy na pangangalaga sa mga puno at iba pang likas na yaman sa loob ng pamantasan.
“Kaya simula ngayon, ang mga puno at ang mga National Historical Sites ay dapat nating alagaan,” pahayag ni Fr. Pilario.
Binigyang-diin din ng pari na hindi maaaring ipagsawalang-bahala ang mga makasaysayang pook sa San Marcelino, kabilang ang Archdiocesan Shrine of Our Lady of the Miraculous Medal, na dating Church of San Vicente de Paul, at ang Adamson University campus, na kapwa kinikilalang Level II historical marker sites.
Kasabay nito, nagsagawa ang mga kalahok ng ribbon-tying ceremony sa mga daan-daang taong gulang na puno sa harap ng pamantasan bilang sagisag ng kanilang panawagang ipatupad ang mahigpit na polisiya laban sa pagputol ng mga puno.
