649 total views
Iginiit ng Save the Trees Coalition (STC) ang kahalagahan ng siyentipiko at legal na pamamahala sa mga puno matapos nitong madokumento ang isang nighttime tree topping operation sa isang matandang puno ng Acacia sa kahabaan ng MacArthur Highway sa San Fernando City, Pampanga.
Ayon sa koalisyon, namataan noong July 2 ang mga tauhan ng City Public Order and Safety Coordinating Office (CPOSCO) na nag-aalis ng malalaking sanga ng puno, na isinagawa bilang tugon sa mga reklamong natanggap mula sa publiko.
Bagama’t kinilala ng kanilang registered professional forester ng STC na mapanganib na ang kondisyon ng puno dahil sa matinding pagkabulok, iginiit ng grupo na ang anumang pruning o pagputol ng puno ay dapat nakabatay sa siyentipikong pagsusuri, wastong dokumentasyon, at pagsunod sa umiiral na batas.
“Public complaints should trigger professional inspection—not automatically justify tree pruning or removal,” pahayag ng Save the Trees Coalition.
Inihayag din ng grupo na walang naipakitang tree-cutting permit mula sa Department of Environment and Natural Resources–Provincial Environment and Natural Resources Office (DENR-PENRO) habang isinasagawa ang kanilang pagdodokumento sa lugar.
Dahil dito, nanawagan ang STC sa pamahalaang lungsod na isabatas ang paggamit ng science-based Tree Risk Assessment (TRA) at malinaw na standard operating procedures sa pamamahala ng mga puno sa mga lansangan.
“Saving trees does not mean preserving every tree regardless of condition. It means ensuring that decisions affecting our urban trees are evidence-based, professionally justified, legally compliant, and made with the safety of the community in mind,” giit ng STC.
Sa kanyang ensiklikal na Laudato Si’, binigyang-diin ni Pope Francis na ang pangangalaga sa kalikasan ay hindi lamang usaping pangkapaligiran kundi isang moral na tungkulin at mahalagang bahagi ng pagsusulong ng kabutihang panlahat
