10,657 total reads
Nagsama-sama ang mga kabataan sa Guinobatan, Albay para sa isang makabuluhang araw ng sining, talakayan, at voter education sa ilalim ng programang “Kabataang Mulat: Empowering Voices, Educating Voters!”
Layunin ng aktibidad na palalimin ang kamalayan ng mga kabataan hinggil sa kanilang mahalagang papel sa paghubog ng kinabukasan ng bayan sa pamamagitan ng responsable at mapanuring pakikilahok sa mga usaping pampulitika.
Ayon sa Non-Government Oganization na Kaya Natin Youth Albay na nagsilbing tagapag-organisa ng gawain, hindi sapat na maging tagapanood lamang ang mamamayan sa mga nangyayari sa lipunan sapagkat sa bawat desisyong pampulitika ay nakataya ang kinabukasan, mga pangarap, at kaligtasan ng sambayanan.
“Panahon na upang bawiin natin ang kapangyarihang matagal nang nasa ating mga kamay,” Bahagi ng pahayag ng organisayon.
Katuwang ng grupo sa pagsasagawa ng programa ang MORMS Salin Sining Creatives Production, Social Action Center (SAC) ng Diyosesis ng Legazpi, Local Youth Development Office (LYDO), KNY Camalig, Office of the 3rd District Representative, at ang LGU Guinobatan.
Binigyang-diin sa talakayan na ang boto ay hindi lamang simpleng marka sa balota kundi isang makapangyarihang kasangkapan upang maisulong ang mas maayos na edukasyon, transportasyon, at pamumuhay para sa lahat.
Hinamon din ng grupo ang mga kabataan na maging tunay na “Batang Mulat” hindi lamang sa loob ng bulwagan kundi maging sa kanilang mga tahanan, paaralan, at komunidad sa pamamagitan ng pagbabahagi ng katotohanan at paghahanap ng pananagutan sa mga namumuno sa bayan.
“Huwag na nating hayaang masayang ang ating boses at kapangyarihan—ngayong nakadilat na ang ating mga mata sa katotohanan, huwag na nating hayaang pumikit,” Dagdag pa ng grupo.
Ang gawain ay nagsilbing paalala rin na ang kinabukasan ng bayan ay hindi lamang hinihintay kundi sama-samang isinusulong at binubuo ng mga mamamayang may kamalayan, pananagutan, at malasakit sa kapwa.
Isinagawa ang “Kabataang Mulat: Empowering Voices, Educating Voters!” noong Hulyo 11, 2026 sa Guinobatan, Albay bilang isang makabuluhang araw ng sining, talakayan, at sama-samang paggising ng kamalayan ng kabataan.
