37,712 total reads
Iginiit ng House prosecution panel na hindi dapat maging hadlang ang sub judice rule sa karapatan ng publiko na malaman at maunawaan ang mga nagaganap sa impeachment trial ni Vice President Sara Duterte.
Ayon kay Bicol Saro Party-list Rep. Terry Ridon, mahalagang maipaliwanag sa publiko ang mga ebidensya at legal na usaping tinatalakay sa paglilitis, lalo na’t marami sa mga ito ay teknikal at nakabatay sa mga dokumento.
Ginawa ni Ridon ang pahayag matapos ipabatid ni Impeachment Court Presiding Officer Senator Francis Escudero na maglalabas ang korte sa susunod na linggo ng desisyon kaugnay ng posibleng paglabag sa sub judice rule ng mga sangkot sa paglilitis.
“We will respect the determination and decision of the Senate Impeachment Court on yung po ma-allowable utterances and statements of the parties,” ayon kay Ridon sa isinagawang post-trial briefing.
Sa ilalim ng naturang tuntunin, nililimitahan ang mga pahayag ng mga partido, abogado at iba pang kalahok tungkol sa merito ng kasong nakabinbin sa korte.
Tiniyak din ng prosekusyon na patuloy nitong ipaliliwanag sa publiko ang mga usaping lumalabas sa paglilitis, habang sinusunod ang mga limitasyong itatakda ng Impeachment Court.
“We do not want a trial that is divorced from the understanding of the public,” ayon kay Ridon.
Inaasahang maglalabas ang Impeachment Court ng desisyon sa usapin ng sub judice rule sa pagbabalik ng pagdinig sa Lunes, Agosto 17.
