1,247 total reads
Hinimok ni dating Philippine Ambassador to the Vatican Henrietta De Villa ang mga volunteers ng Parish Pastoral Council for Responsible Voting (PPCRV) na maging katuwang sa pagpapatunay na kayang isagawa ng Bangsamoro Autonomous Region in Muslim Mindanao (BARMM) ang isang mapayapa, responsable, at mapagkakatiwalaang halalan.
Sa panayam sa Radyo Veritas, binigyang-diin ni De Villa na siya ring co-founder at chairman emeritus ng PPCRV ang matagal nang ugnayan ng organisasyon sa mga taga-Bangsamoro, na nagsimula pa noong 2005.
Ayon kay De Villa, mahalaga ang halalan dahil katuwang ng PPCRV ang mga taga-BARMM sa kanilang hangarin para sa sariling pagpapasya, kapayapaan, at pamamahalang nakaugat sa kanilang pagkakakilanlan bilang Bangsamoro.
Ipinunto rin niya na natatangi ang parliamentary elections dahil maisasakatuparan ng BARMM ang sariling parliamentary system habang nananatili itong bahagi ng pamahalaan ng Pilipinas.
“The importance, because we have been partners of PPCRV buhat nung ano… buhat nung 2005, ‘no? And alam ko ‘yung aspirations nila eh that self-determination, at tsaka ‘yung magkaroon ng finally peace, and to be governed by themselves, Bangsamoro talaga… they will make true a system while they are, how do you call that, ‘yung realize their dream, but it’s also within the government of the Philippines.” Bahagi ng pahayag ni De Villa sa Radyo Veritas.
Masaya rin si De Villa para sa mga taga-BARMM na aniya ay matagal nang katuwang ng PPCRV at itinuturing na niya bilang pamilya.
Hinamon niya ang mga Bangsamoro na gamitin ang pagkakataong ito upang ipakita na kaya nilang pamahalaan ang kanilang rehiyon at bumoto nang responsable, sa kabila ng mga negatibong pananaw na iniuugnay sa BARMM.
“This will give them a chance. This will give them a chance, and we want to help them have that chance to prove that they are a good people, they can govern themselves, they are trustworthy, and they know how to vote responsibly.” Dagdag pa ni De Villa.
Samantala, nagpaabot din ng personal na panalangin at mensahe ng suporta si De Villa sa mga PPCRV volunteers na magsasagawa ng tungkulin sa unang BARMM Parliamentary Elections sa September 14, 2026.
Paliwanag ni De Villa, bagamat hindi na siya personal na makararating mismo sa lugar tulad ng mga nakaraang halalan, hiniling niya sa mga volunteers na manatiling ligtas at maisagawa nang maayos ang mga tungkuling ipinagkatiwala sa PPCRV ng Commission on Elections o COMELEC.
“First of all, that you will be safe. And that second, you will be able to cover well, to be able to do the tasks that mandated sa atin sa COMELEC.” Ayon pa kay De Villa.
Umaasa rin si De Villa na sa pamamagitan ng pagbabantay at pakikilahok ng mga volunteers ay mapatutunayan na ang BARMM ay may kakayahang magsagawa ng halalang malinis, mapayapa, at may pananagutan.
“We will prove that otherwise. You will prove that otherwise. I have faith in you, at mahal ko kayong lahat. Pinapagdasal ko kayo araw-araw.” Ani De Villa.
Sa pananaw ng Simbahan, ang pakikilahok sa halalan ay mahalagang pagpapahayag ng pananagutan para sa kabutihang panlahat sa pamamagitan ng tapat na pagboto at pagbabantay sa integridad ng proseso at resulta ng halalan.
