1,198 total reads
Itinalaga ni Pope Leo XIV si Bishop Crispin Varquez ng Borongan bilang bagong obispo ng Diocese of Tagbilaran, na nasa sede vacante mula pa noong September 2025.
Nagbabalik ang obispo na tubong Bohol sa diyosesis kung saan siya unang naordinahang pari.
Inanunsyo ng Vatican ang appointment nitong Huwebes, September 10, sa tanghali sa Roma o alas-6 ng gabi sa Pilipinas.
Si Bishop Varquez, 65 taong gulang, ay hahalili kay Archbishop Alberto Uy, na itinalagang arsobispo ng Archdiocese of Cebu noong September 2025.
Siya ang magiging ikawalong obispo ng Tagbilaran, na itinatag bilang diyosesis noong 1941.
Isinilang ang obispo sa Sevilla, Bohol noong December 5, 1960. Nag-aral ng pilosopiya sa Immaculate Heart Seminary sa Tagbilaran at teolohiya sa St. Augustine Major Seminary sa Tagaytay City.
Naordinahang pari para sa Diocese of Tagbilaran noong April 14, 1989.
Bago siya naging obispo, nagsilbi siyang formator sa mga seminaryo sa Bohol at Tagaytay at humawak ng ilang posisyon sa diyosesis, kabilang ang pagiging vicar general ng Tagbilaran.
Noong 2007, itinalaga siya ni Pope Benedict XVI bilang obispo ng Borongan at inordinahan sa Tagbilaran Cathedral noong October 18 ng parehong taon.
Sa CBCP, nagsilbi si Bishop Varquez sa Permanent Council mula 2013 hanggang 2017 at naging chairman ng Episcopal Commission on Women mula 2019 hanggang 2025.
Sa kasalukuyan, siya ang vice chairman ng CBCP Committee on Bishops’ Concerns at miyembro ng Episcopal Commission on Social Action, Justice and Peace.
