911 total reads
Hinikayat ni Dipolog Bishop Severo Caermare, DD, Chairman ng CBCP Episcopal Commission on the Laity, ang mga layko na kilalanin ang kanilang dignidad at misyon bilang mga binyagang alagad ni Kristo.
Ito ang paalala ni Bishop Caermare sa pagtatapos ng National Laity Week 2026 na may temang “The Laity United in Prayer as Pilgrims of Hope — That Christ may be formed in us.”
Inihayag ng Obispo na ang kagalakan ng isang layko ay hindi lamang dapat nakabatay sa mga organisasyon, ministries o posisyong hawak sa Simbahan, kundi sa pagkakakilanlan bilang taong bininyagan at kabilang kay Kristo.
Binigyang-diin ni Bishop Caermare na sa pamamagitan ng binyag ay tinatanggap ng bawat Kristiyano ang tawag sa kabanalan at pakikibahagi sa misyon ng Simbahan.
Ipinaalala ng Obispo sa mga layko na hindi lamang sila volunteers na tumutulong sa mga pari at obispo, kundi mga co-responsible na bahagi ng iisang misyon ng Simbahan bagamat magkakaiba ang mga charism, organisasyon at paraan ng paglilingkod ngunit iisa ang binyag, pananampalataya at misyon.
Iginiit ni Bishop Caermare ang kahalagahan ng Christian formation, kabilang ang paghubog sa konsensya at responsibilidad ng bawat mamamayan.
Ipinaliwanag ng Obispo na dapat ihiwalay ang pananampalataya sa mga realidad na kinakaharap ng lipunan.
Ayon sa obispo, kailangang makita ang presensya ni Kristo sa araw-araw na buhay—sa pamilya, trabaho, negosyo, pakikitungo sa kapwa, social media at pagtupad sa responsibilidad bilang mamamayan.
Ang hamon ng Obispo, sa halip na itanong lamang kung naging matagumpay ang pagdiriwang ng National Laity Week ay hinimok niya ang mga layko na suriin kung nakikita ba ang presensiya ni Hesus sa atin.
“The theme that we have, ‘That Christ may be formed in us,’ may become for us a pathway where our activities and pastoral works be led—may be led us to Christ and to the service of His Church and the community.Alam natin na maraming mga problema po tayong kinakaharap sa ating bansa, at may mga personal na rin tayong mga problema. Pero alalahanin natin that we are not alone. Yes, the Church journeys with us, and of course, God is journeying with us,” ayon sa panayam ng Radyo Veritas kay Bishop Caermare.
Kaugnay nito, hinimok ni Sangguniang Laiko ng Pilipinas President Brother Alberto Loteyro ang mga layko na ipagpatuloy ang kanilang paglilingkod sa iba’t ibang ministries at patuloy na tuklasin ang kanilang identity at vocation bilang mga layko.
Hinikayat ni Loteyro ang mga layko na dalhin ang diwa ng pagdiriwang sa kanilang patuloy na misyon sa pagpapalaganap ng tunay na “church of the poor”.
