1,005 total reads
Hinimok ni Manila Archbishop Jose Cardinal Advincula ang mga mananampalataya na muling tuklasin ang tunay na kayamanan na hindi nasusukat sa dami ng ari-arian, impluwensya, o tagumpay sa buhay.
Sa kanyang homiliya sa National Celebration ng ika-800 taon ng Transitus ni San Francisco ng Assisi sa UST Quadricentennial Pavilion, sinabi ng kardinal na ipinapaalala ng halimbawa ng santo na ang tunay na yaman ay nakaugat sa tunay na paglilingkod sa Diyos at sa kapwa.
“But Saint Francis reminds us of another kind of wealth. A wealth that cannot be bought. The wealth of a heart free enough to give, humble enough to serve, and empty enough to receive God,” ayon kay Cardinal Advincula.
Sinariwa ng kardinal sa kanyang pagninilay ang buhay ng tagapagtatag ng Franciscan Order, kung saan, mula sa kanyang kabataang naghahangad ng karangalan, naranasan niya ang pagkatalo na naging bahagi ng kanyang pagbabagong-loob.
Gayundin, ang pakikipagtagpo ni San Francisco sa isang ketongin ay nagbago sa kanyang pananaw tungkol sa mga dukha.
“The life of Francis shows that we become free not when we possess everything, but when we no longer need to possess everything,” aniya.
Hamon ng kardinal sa mga mananampalataya na talikuran ang paghahangad ng paghanga ng iba at ang pagsukat sa sariling halaga batay sa posisyon, ari-arian, at mga nagawa sa buhay.
“We need to die to our need to be admired… and desire to measure our worth by our position, possessions, and accomplishments,” giit ni Cardinal Advincula.
Ginugunita ngayong taon ang ika-800 anibersaryo ng Transitus ni San Francisco, na pumanaw noong October 3, 1226 sa Portiuncula sa Assisi, Italy.
Nagbuklod sa pagdiriwang ang mga Franciscano sa pamamagitan ng Inter-Franciscan Ministers Conference of the Philippines, kasama ang mga Domikanong pari na nakiisa sa pagdiriwang.
