565 total reads
Panatilihin ang open pit mining ban at huwag nang ituloy ang pagbubukas ng panibagong coal fired power plant.
Ito ang dalawang kahilingan ni Diocese of Marbel South Cotabato Bishop Dinualdo Gutierrez ngayong bagong taon.
Ayon sa Obispo, ipinagdarasal niya ngayong 2018 para sa kanyang Diocese na mapigilan ang dalawang banta sa pagkasira ng kalikasan sa kanilang lalawigan; una, ang pagtatanggal ng mining ban sa Tampakan Mines; ikalawa, ang nakaambang pagbubukas ng Coal Fired Power Plant sa Ned, Lake Sebu.
Binigyang diin ni Bishop Gutierrez na walang maidudulot na kabutihan sa kanilang lugar at sa mamamayan ang dalawang proyektong ito at lalo lamang madaragdagan ang paghihirap ng mga katutubo.
“Number 1 that the open pit mining of coal and copper in Tampakan should not be lifted. Number 2 that the proposed coal mining in Barangay Lake Sebu would not prosper, that it would stop,” bahagi ng pahayag ni Bishop Gutierrez sa Radyo Veritas.
Ipinaliwanag pa ni Bishop Gutierrez na kabilang ang Ned, Lake Sebu sa mga lugar na sumasailalim sa National Integrated Protected Areas System, kaya kailan man ay hindi maaaring mapahintulutan dito ang anu mang uri ng land explorations.
“The coal is very bad, it is the worst kind, dirty and not even very efficient. That area is already declared as a protected watershed, of course there will be harm to the people around and below the mountain.” Dagdag pa ng Obispo.
Ang Ned, Lake Sebu ay may 27 million metric tons of coal potential, dahilan upang magkainteres dito ang mga Coal power plants.
Samantala ang Tampakan Mines naman sa South Cotabato ay sinasabing maaaring makalikha ng 14.75 billion dollars na investment ayon sa Saggitarius Mines Inc. – ang kumpanyang nakatakdang magmina dito.
Dahil dito, tulad na rin ng nasasaad sa encyclical na Laudato Si ni Pope Francis ay naninindigan ang Diocese of Marbel na hindi nito isasakripisyo ang kalikasan at ang kapakanan ng mga lokal na residente.
