394 total views
Nawa ay magsilbing ‘Eye Opener’ ang naganap na pagsadsad ng Xiamen air sa runway ng Ninoy Aquino International Airport (NAIA), noong Huwebes ng gabi.
Ayon kay Catanduanes Representative Cesar Sarmiento, Chairman ng House Committee on Transportation, hindi karaniwan na umabot sa 36 na oras bago mai-alis sa run way ang sumadsad na eroplano na nagdulot ng malawakang perwisyo sa may higit 30 libong pasahero.
“Very Evident po ang kawalan ng Contingency Plan. Bagama’t puwede nating masabi ang pangyayari ay isang aksidente bihirang mangyari, pero nangyayari,” ayon kay Sarmiento sa panayam ng Radio Veritas.
Sinabi pa ni Sarmiento na kabilang sa mga ipapatawag sa isasagawang imbestigasyon ng Kongreso ang Department of Transportation (DoTR), Manila International Airport, Civil Aeronautics Board maging ang mga airline companies.
“Sana ang ganitong sitwasyon ay naa-anticipate ito para daglian response ang dapat na nagawa ng Airport Authorities para maiwasan yung malaking abala,” dagdag pa ni Sarmiento.
Kabilang din sa ipapatawag sa house inquiry ang Overseas Workers Welfare Administration (OWWA) lalu’t maraming paalis na OFW ang na-standed.
Sa hiwalay na panayam, iginiit ni CBCP-Episcopal Commission on Migrants and Itinerant People Chairman Bishop Ruperto Santos na bigyan ng tulong sa pakikipag-ugnayan sa mga employer ng mga naabalang OFW.
Ayon naman kay Manila International Airport Authority general manager Ed Monreal, aabot sa P15 milyong danyos ang dapat na bayaran ng Xiamen airlines ito ay para lamang sa pagtanggal ng eroplano sa run way ng NAIA.
Sa isang mensahe ng Santo Papa Francisco, hinikayat nito ang mga kompanya at mga negosyante na kilalanin at tupdin ang Corporate Social Responsibility bilang mabuting ehemplo sa mamamayan na tumatangkilik ng kanilang serbisyo at produkto.
