525 total reads
Ito ang inihayag ni Fr. Greg Gaston, Rector ng Pontificio Colegio Filipino at Veritas Correspondent sa Roma, Italya kaugnay sa mga ulat ng sexual abuse ng ilang mga alagad ng simbahan.
Inihayag ni Father Gaston na napakalungkot at napakasakit ang pagkakasangkot ng mga pari sa sexual misconduct.
“Napakalungkot, napakasakit din ang mga nangyayari kaya dapat ipagdasal ang mga kaparian. Dito sa Colegio Filipino 90 percent ng nagtatapos dito ang ina-assign sa seminaryo para sila ang maghubog sa ating mga future na pari,” ayon kay Fr. Gaston sa Veritas Pilipinas.
Inamin din ni Father Gaston na ang mga pangyayari ay maaring manipestasyon ng mga karanasan sa kanilang pagkabata at nagpapatunay na ang pari bilang tao ay lantad din sa mga pagsubok.
“Kaming mga pari, tao din kami pero hindi iyan excuse. Naapektuhan din kami ‘yung formation nung bata pa, sa family minsan may masakit din na experienced. At nanduon din ang temptation. Although ang sexual abuses, child abuses hindi lang naman sa mga pari, marami din ang sexual abused sa mga anak within the family,” paliwanag ni Fr. Gaston.
Ayon sa pari, ang mga pangyayari ay malaking hamon sa lahat sa pagpapanibago at pagsasabuhay ng sinumpaang tungkulin ng bawat mga pari.
“Hindi ‘yan excuse kundi napapasama din dahil tao din ang pari at may commitment ang pari na suppose to be hindi niya gawin ito doon ang mas malungkot,” ayon kay Fr. Gaston.
Unang hinikayat ni Pope Francis ang lahat na magsagawa ng pagdarasal, pag-aayuno at pagbabalik loob sa krisis na kinakaharap ng bansa at ang pagsisikap na hindi na maulit pa ang mga pangyayari.
Base sa canon law, ang mga sexual offenders ng simbahan ay lilitisin sa church tribunal na kabilang sa parusa ang pag-aalis sa kaniya bilang pari na hiwalay pa sa pananagutang sibil.
