456 total views
Ang mga mamimili ang higit na apektado sa mga Polisiya sa pag-aangkat ng bigas ng Pamahalaan.
Ito ang pahayag ni Cathy Estavillo, tagapagsalita ng Bantay Bigas kaugnay sa kasalukuyang sitwasyon ng suplay at presyo ng bigas sa bansa.
“Ang mga Konsyumer lalo na ang mga mahihirap ang lalo pang pinahihirapan ng ganitong kalakaran at polisiya ng Importasyon.” pahayag ni Estavillo.
Ayon kay Estavillo, sinasamantala ng mga exporter at trader ng bigas ang binabalak ng pamahalaan na luwagan ang polisiya hinggil sa pag-aangkat ng bigas.
Ito ay sa pamamagitan ng isinusulong na Rice Tariffication Bill na naglalayong tugunan ang suliranin sa suplay at mataas na presyo ng bigas sa mga pamilihan sa bansa.
“Ginagawa tayong tambakan ng bigas na mababa ang kalidad habang kumikita ng malaki ang mga dayuhang Negosyante. Sa kabilang banda, kumikita naman ang mga Lokal na trader at importer sa pang-iipit at pag-iimbak ng suplay ng Imported na bigas.” dagdag ni Estavillo.
Kinundena naman ng grupo ang National Food Authority sa mga nasirang inangkat na bigas mula Thailand na nadiskubre sa Subic Bay Freeport Zone at Tabaco, Albay.
Sinabi ng grupo na umaabot sa 133,000 at 23,000 kaban ng bigas ang binukbok lamang sa imbakan.
Nagbabala ang grupo sa pamahalaan na huwag gamiting dahilan ang mga binukbok na bigas upang ikatwiran ang tuluyang pag-aangkat ng mga produktong bigas.
Sa halip, hinimok ng Bantay Bigas ang NFA na paghandaan ang pagbili ng palay sa mga Lokal na magsasaka dahil malapit na ang Harvest season.
Sa pag-aaral na inilabas ng Philippine Statistics Authority, patuloy ang pagtaas ng presyo ng bigas sa mga pamilihan sa kabila ng tuloy-tuloy na pag-angkat ng NFA.
Sa kasalukuyan, isinailalim sa State of Calamity ang Zamboanga City dahil sa kakulangan ng supply ng bigas.
Sa isang mensahe ng Kaniyang Kabanalang Francisco kinilala nito ang mga magsasaka bilang mahalagang sektor ng lipunan dahil sa kanilang pagsusumikap na makapaghatid ng mga produktong pagkain sa bawat mamamayan.
