643 total reads
Pinangunahan ng Catholic Bishops Conference of the Philippines Episcopal Commission on Mission ang pagdiriwang ng Pandaigdigang Lingo ng Pagmimisyon sa Chapel of the Eucharistic Lord, SM Megamall, Mandaluyong City.
Hinamon ni Msgr. Esteban Lo, Executive Secretary ng CBCP Episcopal Commission on Mission at National Director ng Pontifical Mission Societies Philippines ang bawat Kristiyano na maging misyonero.
Ayon sa Pari, ang World Mission Sunday ay nagpapaalala sa bawat mananampalataya ng Pandaigdigang Misyon ng Simbahang Katolika na ipalaganap ang Mabuting Balita ng Panginoon.
At sa paghahanda sa nalalapit na pagdiriwang ng ika-500 taon ng Kristiyanismo sa Pilipinas, umaasa si Msgr. Lo na ang bawat Filipino saan mang panig ng mundo ay magiging mga Misyonero.
“Ang World Mission Sunday po ay nagpaalaala sa atin, nag e-encourage at ang challenge sa atin na suportahan po ang pandaigdigang mission ng buong Simbahan. In fact as we prepare for the 500 years of Christianity in the Philippines sa 2021, nawa po ang bawat Filipino ay maging Misyonero. By living the Christian life more fully, by being more active as Catholic ng sa ganun po sa ating salita at gawa ay maging living witnesses tayo.” pahayag ni Msgr. Lo sa Radyo Veritas.
Ipinaliwanag ni Msgr. Lo na sa simpleng pananalangin ay nakikibahagi na ang bawat tao sa unang hakbang sa pagmimisyon.
Sinabi ng Pari na kahit hindi makapunta ang isang mananampalataya sa malalayo at mahihirap na lugar sa mundo ay naipaaabot naman nito ang kanyang pananalangin.
Dagdag pa dito, mas maging epektibo ang pagdarasal kung masasamahan ito ng pagsasakripisyo.
“Una sa lahat sinabi ni Pope Francis na the first missionary act po ay dasal, at sinabi pa po ni Pope Francis na ito ang pinaka most effective na missionary act, bakit po? kahit sino pwedeng magdasal at kahit hindi tayo makapunta sa Thailand, Africa, India, but our prayer makararating doon and then pangalawa po we offer sacrifices, lalo na po yung mga may kapansanan may mga karamdaman at kahit sino sa atin kahit malusog tayo we can offer sacrifice.” Dagdag pa ni Msgr. Lo.
Ang World Mission Sunday ay sinimulan ni Pope Pius XI noong 1926, matapos hilingin ng Pontifical Society for the Propagation of the Faith na magkaroon ng isang araw na pagkilala sa mga Misyonero ng Simbahan, at upang ang bawat isa ay mahikayat na maging tagapagpakalat ng pananampalatayang katoliko.
Nitong Oktubre 21, 2018, ipinagdiwang ang ika-92 taong anibersaryo ng World Mission Day.
