497 total reads
Matagumpay na nagsagawa ng medical mission ang iba’t-ibang medical groups sa ilalim ng pangangasiwa ng Camillians noong ikalima hanggang ikapito ng Hulyo.
Ito ay pagpapatuloy ng grupo sa sinimulan ni St. Camillus na pangangalaga sa mga may sakit, lalong-lalo na ang mga mahihirap.
Umabot sa 1,193 mga pasyente ang natulungan ng grupo sa mga lugar ng San Jose, Calawis, at Boso-Boso sa Rizal.
Kabilang sa mga serbisyong inihatid sa mga mamamayan ay medical, dental, surgical at laboratory.
Mahigit sa 100 mga volunteers ang nagsama-sama upang maisakatuparan ang naturang medical mission at umabot sa P220,000 ang halaga ng mga naipamahaging gamot.
Ang Camillian Medical Mission ay binuo ng St. Mary’s Hospital sa Taiwan, ospital na nasa ilalim ng pangangasiwa ng mga Camillian, St. Camillus Medical Center, Nuestra Señora dela Annunciata Parish at Camillian Philanthropic and Health Development Office.
Nagpapasalamat din ang grupo sa lahat ng mga tumulong at nagbigay ng pinansyal na suporta sa Medical Mission.
Tiniyak nito na muling magkakaroon ng Camillian Medical Mission sa iba pang bahagi ng bansa upang abutin ang mga mahihirap.
Ayon sa World Health Organization, tinatayang 30-porsyento lamang ng kabuuang populasyon ng Pilipinas ang nakakukuha ng maayos na medikal na atensyon habang ang 70-porsyento ay napagkakaitan ng kanilang medikal na pangangailangan dahil sa kahirapan.
