663 total reads
Magsasagawa ng assessment ang mga tanggapan ng Caritas Network at Social Action Center sa iba’t-ibang lalawigan na naapektuhan ng bagyong Bising upang malaman ang lawak ng naging pinsala nito.
|Ito ay matapos na manalasa sa ilang lalawigan sa Bicol Region at Samar Province ang bagyo na itinuring na pinakamalakas na nabuo ngayong taon ngunit hindi naman direktang tumama sa kalupaan ng Pilipinas.
Ayon kay Rev. Fr. Renato Dela Rosa ng Diocese of Virac sa Catanduanes, naghanda na sila ng mga relief goods na maaring ipamigay sa mga naapektuhang residente.
Magugunitang noong taong 2020 ay labis na napinsala ng bagyong Rolly ang lalawigan dahilan upang hindi pa tuluyang makabangon ang marami sa mga residente.
Sa Diocese ng Legaspi sa Albay, inihayag ng bagong talagang Social Action Director nito na si Rev. Fr. Eric Martillano na nakikipag-ugnayan na sila sa lokal na pamahalaan at iba’t-ibang mga parokya upang alamin ang naging pinsala ng bagyo.
Ilan aniya sa mga residente ang inilikas dahil sa pagbaha at pagguho ng lupa.
“Simula kagabi hanggang ngayon, moderate to heavy ang ulan all over Albay.. May mga evacuees since yesterday especially sa mga areas na flood and landslide prone.”
Kaugnay nito maagap din na nakipag ugnayan ang Caritas Caceres sa lalawigan ng Camarines Sur upang matiyak na mababantayan ang naging epekto ng bagyong Bising.
Sinabi ni Caritas Caceres Director Rev. FR. Marc Real na una na nilang hiniling sa mga Parokya sa Archdiocese na buksan ito para sa mga residente na naapektuhan ng bagyo.
“We have a few parishes who reported to house evacuees already. We have sent communication to our priest to open their churches/parish hall as temporary shelter. We promised to send them assisstance once we gather data.” Pahayag ni Fr. Real.
Sa kasalukuyan ay patuloy na nagbabanta ang bagyong Bising sa ilang mga lalawigan sa hilagang silangan ng Luzon bagamat bahagyan na itong humina.
Batay sa datos noong taong 2020 kung saan naranasan sa bansa ang pananalasa ng bagyong Rolly ay umabot sa mahigit 385 libong indibidwal ang naapektuhan nito partikular na sa Bicol Region.
