643 total views
Kapanalig, ang pandemya ay patuloy na sumusubok sa kakayahan ng ating sektor pang-kalusugan. Sa pagkahaba-haba ng health crisis na ito, ilang beses na halos sumuko ang maraming hospital sa ating bayan.
Ang pandemya ay nagpapalala ng mga suliranin na matagal ng nararanasan ng sektor. Ayon sa Philippine Institute for Development Studies (PIDS), medyo napapag-iwanan na tayo ng ating mga karatig bansa sa ASEAN pagdating sa “critical health outcomes and access indicators.”
Kailangang harapin din ang mga hamon na matagal ng naka-ambang sa health sector, gaya ng mga puwang o gaps sa health financing, health service delivery, governance, at health human resources.
Nakita sa pagsusuri na limitado ang bilang ng mga hospital beds—kailangan pa ng mga 400,000 hospital beds upang makamit ang kailangan na 2.7 beds kada isang libong tao. Hirap din maka-access ang karamihan sa mga health facilities. Kalahati lamang ng mga Filipino ang nakakayanang maka-access ng primary health care sa loob ng 30 minuto, na tinakdang standard time ng gobyerno. Kailangan din maitaas pa ang health spending ng bayan, na napapag-iwanan na rin ng mga karatig bansa natin sa ASEAN.
At ngayong panahon ng pandemya, mas lalo nating nakita ang kahalagahan ng human resources sa sector. 90% ng mga rural health units o primary healthcare natin ay may isang doktor, pero marami pa rin ang walang nurse o kumadrona. Isa rin siguro ito sa mga dahilan kung bakit mababa ang ating score sa WHO preparedness for public health emergencies. 53% lamang ang score natin dito, na isa sa mababa sa ASEAN.
Matinding na suporta ang kailangan ng ating health sector, kapanalig. Ang kabayanihan at dedikasyon ng mga manggagawa nito ay kailangan nating mabigyan ng karampatang suhay – kung baga sa bangka, kailangan nila ng katig upang diretsong makapagserbisyo.
Kailangan din ng kalinga ng sektor na nagtitiyak ng kalusugan ng bayan. Karampatang suweldo para sa mga manggagawa, karampatang bilang ng manpower at pasilidad, at mas mataas na investments o pamumuhunan sa sektor ang kailangan ngayon. Ang mga manggagawa sa sektor ay ating mga frontliners: taga-sangga sa pangunahing banta sa ating mga mamamayan ngayon. Upang lalo natin silang mapalakas, iprayoridad natin ang kanilang pangangailangan. Ayon nga mismo kay Pope Francis sa kanyang pahayag mula sa Vatican noong June 20, 2020: ang mga doktor, nurses, at healthworkers ay “a visible sign of humanity that warms the heart.”
Sumainyo ang Katotohanan.
