507 total views
Ikinagagalak ng opisyal ng Vatican na sa kabila ng pandemya ay patuloy na napapakinggan ng sambayanang Kristiyano ang Ebanghelyo ng Panginoon.
Ito ang iniihayag ng Kaniyang Kabunyian, Luis Antonio Cardinal Tagle, Prefect of the Congregation for Evangelization of Peoples, sa pamamagitan ng mga ‘online Mass’ na ginaganap sa Radio Veritas Chapel.
“Salamat na lamang po sa teknolohiya, kahit na kung minsan ay limitado ang ating pagdalo sa Eukaristiya ng presensya. Tayo naman po ay patuloy na nakakaranas ng pagbubuklod bilang sambayanan,” ayon kay Cardinal.
Si Cardinal Tagle ay kasalukuyang nasa bansa para sa isang maigsing bakasyon, makaraang maitalaga ng Santo Papa sa ilang posisyon sa Simbahan na nakabase sa Roma.
Ayon sa Cardinal na sa kabila ng mga limitasyon ay dapat na ipagpasalamat pa rin na may teknolohiyang magagamit upang patuloy na maihatid sa mananampalataya ang ‘Salita ng Diyos’ at maranasan pagbubuklod-buklod kasama ang Panginoon.
Pinangunahan ni Cardinal Tagle ang isa sa apat na ‘online Healing Masses’ ng himpilan.
Ang Radio Veritas at Facebook page na Veritas846.ph ay nagsasahimpapawid ng apat na Misa kada araw, ito ay tuwing ika-6 ng umaga; ika-12 ng tanghali; ika-6 ng gabi; at ang ika-12 ng hatinggabi sa programang Healing Touch of the Air.
Layunin ng online Masses ang maihatid sa mananampalataya ang ‘Eukaristiya’ lalu na sa panahon ng pandemya na kinakailangan ang pag-iingat upang makaiwas sa pagkahawa mula sa novel coronavirus.
Sa kasalukuyan ay patuloy na umiiral sa National Capital Region ang ‘Enhanced Community Quarantine’ hanggang sa August 20.
Base na rin sa umiiral na panuntunan ng ECQ ay ipinagbabawal ang ‘mass gatherings’ kabilang na ang pagdiriwang ng Misa sa mga parokya.
