Mga Kapanalig, hindi natin maikakaila ang lawak at lalim ng impluwensya ng social media sa buhay nating mga Pilipino.
Sa buong mundo, nangunguna nga tayo sa haba ng oras na inilalaan natin sa paggamit ng social media. Sa isang araw, ang mga Pilipino ay karaniwang gumugugol ng apat na oras at 15 minuto sa social media, malayo sa global average na dalawang oras at 25 minuto. Sa isang survey naman ng Social Weather Stations, lumabas na halos lima sa sampung Pilipino ang may access sa internet. Sa bilang na ito, 98% o 29.4 milyon ang may Facebook account, at 24% ang nagsabing dito sila nagbabasa ng balita araw-araw. YouTube naman ang pangalawang pinakasikat na application para sa mga lumahok sa survey.
Kasabay ng mabilis at maraming impormasyong natatanggap natin sa social media ay ang pagsikat ng mga personalidad na nagsisilbing tulay ng mga ito. Sila ang mga tinaguriang “social media influencers” na ang bawat post ay tinatangkilik ng libu-libo, ang bawat video ay pinapanood ng kanilang mga followers, at ang anumang pinauuso nila ay ginagaya ng marami. Sinasabi ngang maaaring kumita ng hindi bababa sa tatlumpung libong piso sa bawat post ang isang sikat na influencer. Kaya naman, napakaraming naeengganyong magkaroon ng sariling Facebook page, YouTube channel, at iba pang social media account.
Gaya ng ipinahihiwatig sa tawag sa kanila, malawak ang naaabot ng mga influencers. Kaya dapat nilang maunawaang may kaakibat na responsabilidad ang paglalabas ng kanilang content sa social media. Bukod sa pagbibigay ng entertainment sa kanilang mga followers, subscribers, at viewers, nagiging daan din sila upang maipalaganap ang mga impormasyon at opinyong maaaring humubog sa isipan ng mga tao.
Kaya’t nakalulungkot na may ilang influencers na ginagamit ang kanilang tinatawag na platform upang magpalaganap ng kasinungalingan, intriga, at paninira. Mayroon ding nagiging instrumento upang pabanguhin ang pangalan ng mga taong lantarang umaabuso sa kanilang kapangyarihan o hindi kumikilala sa karapatang pantao. Nariyan din ang mga influencers na nagiging kasabwat ng mga tao at grupong nais pagtakpan ang mga mali sa kasaysayan para sa pulitikal na layunin. Ito ang tinatawag nating negative historical revisionism.
At ngayong buwan kung kailan natin ginugunita ang pagsasailalim sa Pilipinas sa batas militar ng diktador na si Ferdinand Marcos, nagkalat sa social media ang mga posts at video na ipinipinta ang panahong iyon bilang isang yugto sa ating kasaysayan na maunlad at tahimik ang bansa. Pilit nilang isinasantabi ang mga pang-aabuso at katiwalian sa pamahalaan, ang kahirapan at pagdurusa sa mga kanayunan, at ang malawakang pagpatay sa mga itinuturing na kalaban ng mga nasa poder. Sa pagtuon lamang sa mga positibong katangian ng yumaong diktador, nabubura na ang kawalang-katarungang ibununga ng kanyang mapang-abusong rehimen. Hindi ito tama. Hindi ito makatarungan.
Bagamat kinikilala ng Simbahan ang benepisyong hatid ng internet at social media, sinasamahan nito ito ng babala tungkol sa komunikasyong walang pagtitimbang at pagninilay para makarating sa tamang pagpapasya. Binibigyang-diin sa mga panlipunang turo ng Simbahan na ang tamang layunin ng impormasyong pinalalaganap ng media (na akma rin sa social media) ay ang pag-aambag sa ikabubuti ng tao. Sa madaling salita, minumulat ba tayo ng mga ito sa tungkol sa ating dignidad? Ginagawa ba tayong mas makatao at mabuti sa ating kapwa?
Mga Kapanalig, kung hindi man natin maiimpluwensyahan ang mga influencers upang gamitin ang kanilang kasikatan sa responsableng paraan, tayo na mismo ang maging responsable sa pagpili ng mga tatangkilikin nating influencers. Kapag pipiliin natin ang mga influencers na nagpapahayag ng katotohanan, naisasabuhay natin ang nasasaad sa Efeso 4:25: “itakwil natin ang pagsisinungaling at tayong lahat ay magsabi ng totoo sa isa’t isa, sapagkat tayo’y bahagi ng iisang katawan.”
