528 total views
Inihayag ni Caritas Manila Executive Director at Radio Veritas President Rev. Fr. Anton CT Pascual ang pakikiisa sa pagdiriwang ng Simbahang Katolika sa “World Day of the Poor” ngayong araw ika-14 ng Nobyembre.
Ayon kay Fr. Pascual,tunay na pinahahalagahan ng Simbahang Katolika ang mga mahihirap sapagkat ito ang itinuturing na ‘Church of the Poor’ kaya nakatuon ang mga programa nito sa pagtulong at pag-agapay sa mga mahihirap.
Naniniwala ang Pari na ito rin ay hamon sa mga nasa pamahalaan na itutok ang kanilang mga programa at plataporma batay sa panaghoy ng mga dukha na bumubuo sa malaking bahagi ng populasyon sa Pilipinas.
“Dapat lahat ng ginagawa ng Simbahan at pamahalaan ay sumusukat sa pananaw ng mahihirap. Bakit? Sapagkat ang Simbahan sa Pilipinas ay ‘Church of the Poor’ at ang mayorya ng mga Pilipino ay dukha. Sabi nga ni Hesus sa Matthew 25: Anuman ang gawin ninyo sa pinaka aba ay ginawa ninyo sa akin” mensahe ni Fr. Pascual.
Magugunitang ang Simbahang Katolika sa Pilipinas ay naging aktibo sa pagtulong sa mga mahihirap lalo na sa panahon ng pandemya.
Ang Caritas Manila na siyang social arm ng Arkidiyosesis ng Manila at pinamumunuan ni Fr. Pascual ay nakapagtala na ng mahigit sa P385 milyong piso na halaga ng tulong sa mga ‘ultra poor families’ sa loob at labas ng Metro Manila.
Tinatayang nasa 1.4 milyong indibidwal o mahigit sa 245,000 pamilya ang nabiyayaan ng Caritas Manila ng mga gift certificates sa Luzon, Visayas at Mindanao bago pa man magtapos ang huling bahagi ng taong kasalukuyan.
Unang nagpahayag ng imbitasyon ng pakikiisa ang Commission on Social Services and Development ng Archdiocese of Manila para sa pagdiriwang ng banal na misa para sa World day of the Poor.
Ang misa ay pangungunahan ni Manila Archbishop Jose Cardinal Advincula sa Immaculate Conception Cathedral, Intramuros Manila ganap na alas-dose ng tanghali, araw ng lunes ika-15 ng Nobyembre.
Batay sa datos ng tinatayang nasa 17.6 Million indibidwal sa Pilipinas ang nabubuhay sa tinatawag na ‘below poverty line’ habang nasa 64% ng mga pamilya sa Pilipinas ang nakakaranas ng suliranin sa pagkakaroon ng sapat na pagkain.
Ang World day of the Poor ay unang inilunsad ni Pope Francis noong taong 2017 sa Vatican.
