869 total reads
Muling hinihikayat ng Simbahan ang mga botante na tuwinang maging mapanuri sa paghahanap ng katotohanan lalo na’t papalapit na ang halalan.
Sa pahayag ni Novaliches Bishop-Emeritus Teodoro Bacani Jr. sa Simbahan at Halalan ‘One Godly Vote’ campaign ng Archdiocese of Manila, hindi lamang ‘guns, goons and gold’ ang ginagamit ng mga kandidato para makakuha ng boto ng publiko.
Sinabi ni Bishop Bacani na dulot ng nagbabagong panahon at pagbabago ng teknolohiya ay ginagamit na rin ang social media upang magpalaganap ng maling impormasyon laban sa magkakalabang pulitiko.
Ayon sa Obispo, ito ay maaaring magdulot ng kalituhan o magpabago sa pananaw ng mga botante na makakaapekto sa resulta ng botohan.
‘‘Kapagkaganyan, hindi na ang ‘will of the people’ ang nangyayari. At tandaan natin ‘yan, if the will of the people is not accomplished, not fulfilled then ang mangyayari niyan e hindi na rin will of God ang maboboto kapag dinaan sa panlilinlang,” ayon sa Obispo.
“Hindi natin masasabi na ang kandidatong nanalo sa pamamagitan ng panlilinlang ay ginawa ng Diyos, binigyan ng Diyos ng kapangyarihan.”
Sa ganitong pangyayari sinabi ni Bishop Bacani ang pag-iral nang panglilinlang ay hindi ang ‘kagustuhan ng tao’ o will of the people ang nananalo sa halalan.
Sa pagpapatuloy ng kampanya, ilang mga kandidato ang gumagamit nang panlilinlang sa publiko sa pamamagitan ng fake news sa social media at mga paratang ng ‘hakot system’ at mga ‘bayarang tagasuporta’.
