655 total views
Sikaping muli ng mananampalataya na personal na tumanggap ng mga banal na sakramento sa simbahan.
Ito ang panawagan ni Taytay, Palawan Bishop Broderick Pabillo – chairman ng CBCP – Episcopal Office on Stewardship sa pagdalo sa mga banal na misa ng mananampalataya.
Aminado ang Obispo na bagamat patuloy pa ring masusubaybayan ang mga online masses ng iba’t ibang mga parokya ay marapat pa ding bumalik sa personal na pagsisimba sa mga Simbahan ang mananampalataya lalo na tuwing araw ng Linggo na itinuturing na araw ng Panginoon.
Ipinaliwanag ni Bishop Pabillo na mahalagang bigyan ng panahon ang muling pagbabalik sa mga Simbahan sa gitna ng mababang kaso ng COVID 19.
“Marami pa po ang sumusubaybay sa ating banal na misa na online pero sana dahan-dahan ay pumasok na tayo sa tunay na pagsisimba sa ating mga Simbahan kasi bumababa na rin ang mga kaso [ng COVID-19 infection] at nakakapunta na tayo sa mga malls, nakakapunta na tayo ngayon sa palengke, nakakalabas na tayo at sana po sa banal na misa at least tuwing Linggo sikapin po natin makabalik na din sa Simbahan upang matanggap hindi lamang ang Salita ng Diyos pero pati ang katawan ni Kristo sa ating pagku-komunyon.” mensahe ni Bishop Pabillo sa Radio Veritas.
Matatandaang kabilang sa mga ipinagbawal noong kasagsagan ng COVID-19 virus sa bansa ay mga pagtitipon sa mga Simbahan at iba pang mga religious activities tulad ng personal na pagdalo sa mga banal na misa at pagdaraos ng mga pista.
