342 total views
Hindi sapat ang umento sa sahod o wage hike na ipapatupad sa iba’t-ibang rehiyon sa bansa.
Ito ang ipinahayag ng mga labor groups sa inaprubahang 33-pesos na wage hike sa National Capital Region, 35-pesos sa MIMAROPA, 32-pesos sa SOCCSKSARGEN at 55 hanggang 110-pesos na umento sa sahod sa Western Visayas.
Ayon kay Elmber Labog – Chairperson ng Kilusang Mayo Uno (KMU), dismayado ang kanilang grupo dahil napakaliit ng umento sa suweldo ng mga manggagawa gayong napakabilis ng inflation rate na pinataas ang presyo ng mga pangunahing bilihin sa merkado.
“Too little, too late, malayong malayo ang mga halagang yan sa itinaas ng presyo ng mga bilihin lalo na sa harap ng linggo-linggong na pagtataas ng presyo ng langis, Samakatuwid tuloy- tuloy din ang pagtataas ng presyo ng bilihin at serbisyo! Tingi ang P33 kumpara sa P1, 080 antas ng family living wage! maliit ang dagdag na ito sa P537 na kasalukuyang minimum wage sa Metro Manila,” ayon sa ipinadalang mensahe ni Labog sa Radio Veritas.
Samantala, bagamat naliliitan sa halaga ay kinilala naman ni Sonny Matula – Pangulo ng Federations of Free Workers ang wage hike na ipinatupad ng RTWPB.
Iginiit naman ni matula na kinakailangan parin ng 100-billion pesos economic stimulus package na magsisilbing pondo sa mga subsidy higit na sa mga manggagawang nawalan ng kabuhayan ng dahil sa pandemya.
Naninindigan ang KMU at FFW na dapat ipatupad ang mga batas na tutulungan ang mga manggagawa ng pantay-pantay na sahod na sapat para sa kanila at pamilyang sinusuportahan.
Kaisa naman ang simbahang katolika sa pagpapatupad ng mga polisiyang tutulungan ang mga manggagawa at mamamayan na makapamuhay ng may dignidad.
Una naring nakiisa ang Church People – Workers Solidarity (CWS) sa bawat sektor ng manggagawa kung saan kanilang naging pananawagan sa mga naihalal na bagong lider ng bansa ang pagsusulong ng mga batas na tutulungang makapamuhay ng may dignidad ang labor sector ng Pilipinas.
