776 total reads
Hinimok ni Cabanatuan Bishop Prudencio Andaya ang mga katutubo na manatiling matatag sa pagtataguyod ng kanilang dignidad at karapatan bilang bahagi ng Simbahang Katolika at mga anak ng Diyos.
Sa kaniyang mensahe para sa pagdiriwang ng National Indigenous Peoples Sunday sa Sitio Bacao, Palayan City, Nueva Ecija, tiniyak ni Bishop Andaya na hindi nag-iisa ang mga katutubo sa kanilang paglalakbay, dahil kasama nila ang Simbahan sa pakikinig sa kanilang mga saloobin at pakikiisa sa kanilang misyon.
Binigyang-diin ng obispo na nararapat kilalanin ang dignidad ng mga katutubo bilang mga kapatid kay Kristo, gayundin ang kanilang mahalagang papel sa buhay at misyon ng Simbahan.
Hinikayat din niya ang mga ito na magpatuloy nang may lakas ng loob, sa katiyakang hindi sila pababayaan ng Simbahan sa pagsusulong ng kanilang mga adhikain.
Binigyan-diin ni Bishop Andaya ang kahalagahan ng sama-samang paglalakbay ng Simbahan at mga katutubo, sa pamamagitan ng pakikinig sa kanilang mga karanasan, pagkilala sa mga pangangailangan, pagsuporta sa misyon at mithiin.
“May isa po akong mensahe para sa mga katutubo ngayon.Sa araw ng Indigenous Peoples Sunday dito sa Bacao, hindi po kayo nagiisa bilang mga kapatid namin. Kayo po ay bahagi po ng ating simbahan, kayo po ay may dignidad, kayo po ay kabahagi rin ng mga anak ng Diyos dito sa lupa.So, keep courage mga katutubo, we will always be together with you sa paglalakbay. Makikinig kami sa inyo at sabay-sabay tayong magmisyon,” ayon sa panayam ng Radyo Veritas kay Bishop Andaya.
Ang pagdiriwang ng National Indigenous Peoples Sunday ngayong taon ay nakatuon sa pakikiisa sa mga katutubo, partikular sa pagtatanggol sa kanilang mga karapatan, lupang ninuno, kalikasan, at kultura.
Pinangunahan ito ng Catholic Bishops’ Conference of the Philippines – Episcopal Commission on Indigenous Peoples (CBCP-ECIP), katuwang ang Diyosesis ng Cabanatuan, bilang pagpapahayag ng paninindigan ng Simbahan na makilakbay sa mga katutubo at kilalanin ang kanilang dignidad at mahalagang ambag sa lipunan at sa pananampalataya.
