576 total reads
Ipagdiriwang ng Simbahang Katolika sa Pilipinas ang National Indigenous Peoples Sunday sa October 11, 2026 sa Bulwagan ng mga Katutubo, Sitio Bacao, Palayan City, Nueva Ecija, sa temang “Pakikipaglakbay sa mga Katutubo: Pagpaparangal sa Nilikha ng Diyos at Karapatan ng Kalikasan.”
Pangungunahan ng pagtitipon ang pagsusulong ng karapatan ng mga katutubo, pangangalaga sa kanilang mga lupang ninuno, at pagprotekta sa kalikasan, kasabay ng pagtatapos ng Season of Creation kung saan tampok sa pagdiriwang ang karanasan ng mga Ayta sa Bacao at mga Dumagat sa Nueva Ecija, kabilang ang kanilang kalagayan, mga pangarap, at mga usaping kinakaharap ng kanilang mga komunidad.
Inihayag ng Catholic Bishops’ Conference of the Philippines Episcopal Commission on Indigenous Peoples. o CBCP-ECIP sa Radyo Veritas na naging resettlement area ang Bacao para sa mga Ayta matapos ang pagputok ng Bulkang Pinatubo noong 1991, at kalaunan ay nagsagawa rin ang komunidad ng mga hakbang para sa reforestation, agrikultura, at pagpapaunlad ng kabuhayan.
Magkakaroon din ng Banal na Misa at pagtatanim ng mga katutubo ng endemic na puno sa paligid ng Bacao Mission bilang konkretong pagpapakita ng pakikiisa sa komunidad at pangangalaga sa sangnilikha.
Bahagi ng programa ang diyalogo at bukas na talakayan hinggil sa karapatan ng mga katutubo, pangangalaga sa lupang ninuno, pagpapanatili ng kultura, at proteksiyon sa kalikasan.
Kabilang sa mga patuloy na hamong bibigyang-pansin ang mga banta sa lupang ninuno, pagkasira ng kapaligiran, sapilitang pagpapalikas, pagkawala ng tradisyonal na kabuhayan, at paglabag sa karapatan ng mga katutubo sa malaya, pauna, at may sapat na kaalamang pahintulot o Free, Prior and Informed Consent kaya binigyang-diin ng Simbahan ang pagsusulong ng diyalogo, katarungan, kapayapaan, dignidad ng tao, at pangmatagalang pakikipag-ugnayan sa mga katutubong pamayanan.
Ang pakikiisa ng CBCP-ECIP sa mga katutubo ay pagtalima sa panawagan ni Pope Francis sa kaniyang ensiklikal na Laudato Si na pangalagaan ang ating iisang tahanan at kilalanin ang ugnayan ng pagkasira ng kalikasan, karapatan ng mga pamayanan, at pananagutang pangalagaan ang sangnilikha.
