999 total views
Tiniyak ng Hapag-Asa ang kahandaan sa pinangangambahang pagharap sa banta ng kakulangan ng pagkain sa bansa.
Ito ang tugon ng Hapag-Asa sa pahayag ni William Dar, kalihim ng Department of Agriculture na maaaring makaranas ng ‘food crisis’ hindi lamang ng Pilipinas kundi maging ang buong mundo dahil sa pananatili ng pandemya, mataas na presyo ng mga produktong petrolyo at pagpapatuloy ng digmaan sa pagitan ng Russia at Ukraine.
Inihayag ni Florinda Lacanlalay, Hapag-Asa Integrated Nutrition Program consultant na patuloy na makatanggap ng sapat na nutrisyon at makakain ang mga bata at matatandang kabilang sa kanilang mga programa.
“We have to step-up, kailangan ‘yung aming feeding program for instance ‘yung Hapag-Asa should be able to provide some foods, so kailangan – we are also preparing for that at yung isang dapat tingnan na how can we be of help to our countrymen should there be a food crisis,” pahayag ni Lacanlalay.
Kaugnay nito, iminungkahi rin ni Lacanlalay sa mamamayan ang pagtatanim sa kanilang mga sariling bakuran upang maging handa sa anumang krisis sa pagkain.
Hinimok naman ni Lacanlalay ang pamahalaan na bigyan ng tulong pinansiyal at suporta ang mga magsasaka at mangingisda upang mapalakas ang lokal na sektor ng food production sa Pilipinas at maiwasan ang kakulangan sa suplay ng pagkain.
Umaasa rin ang opisyal ng Hapag-Asa na unang tutukan ng susunod na pinuno ng DA ang pagpapalakas sa local food production upang matiyak ang food sufficiency sa bansa.
Unang nanawagan ang Kanyang Kabanalan Francisco sa mga lider ng buong mundo na bigyan ng prayoridad ang mga manggagawa sa sektor ng agrikultura.
Naging panawagan na rin ng Catholic Bishops’ Conference of the Philippines sa pamahalaan na tulungan ang mga magsasaka at mangingisda upang matiyak higit na ngayong panahon ng pandemya na mayroon sapat na suplay ng pagkain sa bansa.