535 total views
Nagbabala ang pamunuan ng Radio Veritas sa publiko laban sa mga scammer na ginagamit ang pangalan ng himpilan.
Tinukoy ng himpilan ang mga food delivery platform na kadalasang binibiktima gamit ang pangalan at textline number ng Radio Veritas846AM.
Kamakailan, sunod-sunod na dumating sa himpilan ang mga pagkain mula sa iba’t ibang food outlets na ino-order online gamit ang textline number nito.
Ayon sa Radio Veritas, walang sinumang kawani ng himpilan ang pinahihintulutang gamitin ang pangalan ng institusyon at textline number nito sa personal na pangangailangan.
Pagbabahagi ng isang food chain, isa sa natukoy na nag-order online ang nangangalang George Calimag gamit ang textline number at address ng himpilan sa Quezon City at email address na [email protected].
Gayundin binalaan din ng Radio Veritas ang mamamayan lalo na ang mga obispo at pari laban sa anak ng dating kawani na si Rolando Santoyo na ginagamit ang pangalan ng himpilan sa panghihingi ng tulong pinansyal.
Batay sa mga reklamong natanggap ng Radio Veritas mula sa ilang obispo at pari, nagpakilala itong kawani ng himpilan at nangangailangan ng tulong pinansyal para sa pagpapagamot.
Nilinaw ng institusyon na nagbigay na ng tulong ang himpilan at Caritas Manila para sa pamilya ni Santoyo.
Gayunman, nagpapatuloy pa rin ito sa pagpapadala ng text messages gayundin sa pamamagitan ng personal message sa social media account ng mga pari at Obispo.
Mariing pinaalalahanan ng Radio Veritas ang publiko na beripikahin ang mga natatanggap na mensahe o sulat gamit ang pangalan ng Radio Veritas upang makaiwas sa panloloko.
Maaring tumawag sa official number ng himpilan sa (02) 8925-7931 hanggang 39 para makupirma ang mga natatanggap lalo na sa online at usaping pinansyal.
