409 total reads
Itinaas na sa 19 na lalawigan sa Northern Luzon ang Storm Signal Number 1 dahil sa patuloy na paglapit ng bagyong Lawin.
Ayon sa pinakahuling update ng Philippine Atmospheric Geophysical and Astronomical Services Administration o PAGASA, naka-taas na ang storm signal number 1 sa lalawigan ng Ilocos Norte, Apayao, Cagayan kasama ang Calayan group of Islands, Batanes group of Islands, Isabela, Kalinga, Abra, Ilocos Sur, Mt. Province, Ifugao, Quirino, Nueva Vizcaya, Benguet, La Union, Aurora, Nueva Ecija, Pangasinan, Catanduanes at Polillo Islands.
Huling namataan ang bagyong lawin 930 kilometro silangan ng Tayabas Quezon taglay ang lakas ng hangin na aabot sa 185 kilometro malapit sa gitna at pagbugso na aabot sa 239 kilometro kada oras habang kumikilos sa bilis na 25 kilometro kada oras.
Inaasahan na mag-landfall ang bagyo sa Cagayan sa Huwebes ng madaling araw at tatawirin nito ang kalupaan ng Apayao at Ilocos Norte bago.
Pinangangambahan ng PAGASA na maging isang Super Typhoon ang bagyong Lawin bago pa man ito tumama sa kalupaan ng Northern Luzon kaya’t pinag-iingat ang lahat ng mamamayan lalo na ang mga nasa posibleng tamaan ng mata ng bagyo.
Patuloy naman ang pag-apela ng pagdarasal ng Archdiocese of Tuguegarao sa posibleng maging epekto ng bagyo.
Ayon sa Social Action Director ng nasabing arkidiyosesis na si Fr. Augustus Calubaquib, inihahanda na nila ang mga parokya sa kanilang lalawigan at pinaalalahanan ang lahat na mag-ingat at sumunod sa anunsyo ng mga otoridad.
Magugunitang nito lamang nakalipas na araw ay nanalasa sa bansa ang bagyong Karen kung saan aabot sa halos 3 libong pamilya ang naapektuhan at 3 ang naitalang nasawi.
