2,239 total views
Ang kulay pula ay kulay na sumisimbolo sa dugo ng mga martir ng Simbahang Katolika.
Ito ang binigyang diin ni Msgr. Pedro Gerardo Santos – Chief Operating Officer ng Aid to the Church in Need – Philippines kaugnay sa kulay pula na makikita sa sagisag ng pontifical foundation ng Vatican at ang kampanya nito kada taon na tinatawag na Red Wednesday.
Ayon sa Pari, ang kulay na pula simbolo ng maalab na apoy ng Espiritu Santo at pagmamahal sa Diyos na hindi dapat i-ugnay sa anumang pampulitikang partido o personalidad.
Ibinahagi ni Fr. Santos na sinisimbolo din ng kulay pula ang dugo ng mga martir na ibinuwis ang buhay para sa pananampalataya.
“The red is a very important symbol for us Christians, it symbolizes the fire of the Holy Spirit, symbolizes the power of love, it symbolizes the blood of martyrs.” Ang bahagi ng pahayag ni Msgr. Santos.
Ipinaliwanag ni Msgr. Santos na ang patuloy na pag-uusig sa mga Kristiyano sa buong daigdig ay patuloy na pag-atake sa Simbahang Katolika.
Nanawagan ang Pari ng pagkakaisa upang maprotektahan ang Simbahan higit ang mga Kristiyano na dumaranas ng iba’t ibang uri ng karahasan at pag-uusig sa lipunan.
Nakatakda ang Red Wednesday campaign ngayong taon sa ika-23 ng Nobyembre, 2022 na may temang “Blessed are the Persecuted” na naglalayong palakasin ang kampanya para sa pananalangin sa mga Kristiyanong inuusig sa iba’t-ibang panig ng mundo.
Taong 2016 nang simulan ng Pontifical Foundation na Aid to the Church in Need ang Red Wednesday Campaign sa United Kingdom bilang pagpupugay sa mga naging martir at pagsuporta sa mga Kristiyanong kasalukuyang inuusig.
Taong 2017 naman nang makibahagi sa Red Wednesday Campaign ang Pilipinas habang Enero ng taong 2020 ng aprubahan ng Catholic Bishops’ Conference of the Philippines ang institutionalization ng Red Wednesday Campaign ng Aid to the Church in Need sa bansa.
