3,977 total reads
Nakikiisa ang Adamson University sa panawagan ng katarungan para sa tinaguriang Marihangin 10–ang sampung kasapi ng katutubong Molbog sa Sitio Mariahangin, Bugsuk Island, Balabac, Palawan, na inaresto noong ika-15 ng Mayo.
Bilang isang Vincentian institution, mariing kinondena ng pamantasan ang kasong grave coercion na isinampa laban sa mga katutubo.
Giit ng Adamson University, ang pagtatanggol sa lupaing ninuno ay hindi krimen kundi karapatang itinataguyod sa ilalim ng Indigenous Peoples’ Rights Act (IPRA).
Hinimok ng pamantasan ang agarang pagsasantabi sa mga kasong walang batayan at ang pagtitiyak sa kaligtasan ng pamayanan.
Kaisa ng Catholic Educational Association of the Philippines (CEAP) at iba pang faith-based institutions, nananawagan ang Adamson University na tumugon sa panawagan ng katarungan sa pamamagitan ng edukasyon, panalangin, adbokasiya, at konkretong pagkilos.
“To be Vincentian is to walk with the oppressed. To be Christian is to stand where Christ stood–in the margins, with the persecuted. We stand with the Marihangin 10,” giit ng Adamson University.
Una nang iginiit ni Puerto Princesa Bishop Socrates Mesiona sa pamahalaan at mamamayan na kilalanin at igalang ang karapatan ng mga katutubo, na ipinagtatanggol ang kanilang tahanan, kabuhayan, at kultura.
Matagal nang kinikilala ang Mariahangin bilang lupaing ninuno ng mga katutubong grupo, tulad ng Molbog at Cagayanen, ngunit sa mga nagdaang taon ay nagkaroon ng mga alitan kaugnay ng pang-aagaw ng lupa at mga usaping legal sa paninirahan ng mga katutubo sa kanilang lupain.
Tinatayang nasa 96 na pamilya ang naninirahan sa Sitio Mariahangin, kung saan 12 pamilya rito ang mga Katoliko.
