Magsisimula sa Hunyo ang buwanang pastoral visit on the air sa Radio Veritas 846 ng kinatawan ng Kanyang Kabanalan Francisco sa Pilipinas.
Ang pakikibahagi ni Apostolic Nuncio to the Philippines Archbishop Charles John Brown sa programa ng himpilan ay bilang pagpapalakas at pagpapalawak sa ebanghelisasyon at pakikipag-ugnayan ng mananampalataya sa mga lider ng simbahang katolika.
Nakatakda sa Hunyo 14, 2021 ang pastoral visit ng Apostolic Nuncio sa programang Barangay Simbayanan hosted by Ms. Angelique Lazo at Fr. Nolan Que.
Tatalakayin dito ang mga adbokasiya ng arsobispo bilang kinatawan ni Pope Francis sa bansa gayundin ang mensahe ng santo papa para sa mananampalataya.
Matatandaang Enero 11 ng kasalukuyang taon nang unang bumisita ang nuncio sa himpilan na labis ikinatuwa ng mga tagapakinig sapagkat ito ang kauna-unahang pagkakataon na sumahimpapawid sa radyo ang kinatawan ng Vatican sa bansa.
Itinakda tuwing ikalawang Lunes ng buwan ang pastoral visit ng nuncio sa himpilan. Bukod sa nuncio, regular din na panauhin sa pastoral visit sina Manila Apostolic Administrator Bishop Broderick Pabillo, Kalookan Bishop Pablo Virgilio David at Novaliches Bishop Roberto Gaa.
Ilan sa mga obispo naman na naging panauhin sa pastoral visit sina Baguio Bishop Victor Bendico, Imus Bishop Reynaldo Evangelista at San Pablo Bishop Buenaventura Famadico.
Inaanyayahan ng Kapanalig na himpilan ang mamamayan na makiisa at pakinggan ang pastoral visit ng mga lider ng simbahan sa Pilipinas sa Radio Veritas 846, Radio Veritas Bayombong Nueva Viscaya at mapapanuod sa Radyo Veritas Ph.
